काठमाण्डाै – वडा र पालिका अधिवेशन फेरि गर्नुपर्ने आफूहरूको माग सुनुवाइ नगरेको भन्दै नेपाली कांग्रेस डेडल्धुराका सभापति कर्णबहादुर मल्लसहितका नेता, कार्यकर्ताले सानेपामा रहेकाे पार्टीको केन्द्रीय कार्यालयमा रिले अनशन सुरु गरेका छन् । 

पार्टीको विधि, विधान, निर्वाचन निर्देशिका विपरीत गराइएको वडा र पालिका अधिवेशन फेरि गर्नुपर्ने भन्दै उनीहरूले आज बुधवारदेखि पार्टी केन्द्रीय कार्यालयमा रिले अनशन सुरु गरेका हुन् ।

डडेल्धुराका हजारौँ पार्टी नेता, कार्यकर्ताको भावनाअनुसार फेरि अधिवेशन गर्न गरिएको मागको केन्द्रीय सभापति शेरबहादुर देउवाले सुनुवाइ नगरेपछि आफूहरूले बाध्य भएर पार्टी केन्द्रमै रिले अनशन सुरु गर्नुपरेको सभापति मल्लले बताउनुभयो । 

त्यसैगरी नेपाल विद्यार्थी सङ्घ (नेविसङ्घ) जिल्ला कार्य समिति डडेल्धुराकी नेतृ देवकी जोशीले पनि पार्टीका केन्द्रीय सभापतिसँग न्याय माग्न आफूहरू पार्टी केन्द्रीय कार्यालयमानै रिले अनशन बस्न बाध्य हुनुपरेको भन्दै आक्रोश व्यक्त गर्नुभयो ।

सभापति मल्ल नेतृत्वको टोलीले पार्टी केन्द्रीय सभापति देउवाले आफ्नै जिल्लाका पार्टीका बहुमत नेता, कार्यकर्तालाई अन्याय हुने गरी गरिएको वडा र पालिका अधिवेशन फेरि नभए आफूहरू पार्टी केन्द्रीय कार्यालयमै धर्ना र अनशन बस्न बाध्य हुने भन्दै गएकाे कात्तिक २७ गते काठमाण्डाैमा पत्रकार सम्मेलन गरेको थियो ।