कथित ‘उच्च जाति’ का मान्छेले दलित बस्तीमा जाने बाटो नै थुनिदिए

भदौ २६, २०७५ मंगलबार १३:४७:३९ | शुभनारायण यादव

सप्तरी –देशमा संघीयता कार्यान्वयनसँगै सिंहदरबारको अधिकार गाउँगाउँमा पुगेको भनिन्छ ।

तर सप्तरीको तिरहुत गाउँपालिका वडा नम्बर –४, डिमनका दलित समुदाय भने आउजाउ गर्ने बाटो कथित रुपका ‘ठूला जाति’ले बन्द गरिदिँदा बस्ती नै छोड्न बाध्य भएका छन् । बाटो नहुँदा बस्तीका ३६ परिवारमध्ये ४ परिवार विस्थापित भइसकेका छन् भने बाँकीले कष्टकर जीवन बिताइरहेका छन् ।

चमार जातिको बसोबास रहेको बस्तीसम्म पुग्ने बाटो कथित माथिल्लो समुदायका व्यक्तिले २ वर्षदेखि थुनिदिएका छन् । बाटो भएको ठाउँ आफ्नो नम्बरी जग्गामा परेको भन्दै उनीहरुले बाटोमा बार बार्नुका साथै केही ठाउँमा बाटो नै मासेर खेती गर्ने गरेका छन् । जसले गर्दा बस्तीसम्म जेनतेन पुग्ने गरे पनि बिरामी हुँदा एम्बुलेन्स वा कुनै सवारी साधन लैजान सक्ने अवस्था नरहेको स्थानीय शत्रुघ्न रामले बताउनुभयो ।

गर्भवतीलाई व्यथा लाग्दा वा कसैलाई सर्पले टोक्दा ढक्कीमा बोकेर लानुपर्ने अवस्था रहेको उहाँले गुनासो सुनाउनुभयो । स्थानीय तहमा जनप्रतिनिधि आएपछि विभेद अन्त्य होला भन्ने विश्वासका साथ मत दिएर जिताए पनि जनप्रतिनिधिले समेत चासो नदेखाएको उनीहरुको गुनासो छ । पार्टीका नेतालाई आग्रह गर्नुका साथै सीडीओ कार्यालयमा ज्ञापनपत्र बुझाए पनि कतैबाट सुनुवाइ नभएको उनीहरु सुनाउँछन् । स्थानीय रामेश्वर रामले आफूहरु अघोषित नाकाबन्दीको जस्तो अवस्थामा रहेको बताउनुभयो ।

माओवादी युद्धकालमा बस्तीका लागि नयाँ बाटो बनाइएको थियो । तर त्यो बाटोमा समेत अहिले माथिल्लो जातका भनाउँदाहरुले बार बारिदिएका छन् । रामेश्वरले बाटो नहुँदा कुटुम्बले विवाह गर्न समेत आनाकानी गर्ने गरेको पीडा सुनाउनुभयो ।

बिहेका लागि गाउँमा आउने बरियातको गाडीलाई बस्तीभन्दा टाढै राखेर सबैलाई हिँडाउँदै ल्याउनुपर्ने र जाँदा बेहुलीलाई पनि हिँडाएरै पठाउनुपर्ने अवस्था रहँदा कुटुम्बसामु पनि आफूहरुको अपमान हुने गरेको उनीहरु बताउँछन् ।

पशुपालन गरेर जीवनयापन गर्न चाहे पनि बाटो नै भएका कारण सम्भव नभएको डोमीदेवी रामले पीडा सुनाउनुभयो ।

राम बस्तीको समस्या समाधान गर्न आफूहरुले पहल गरेपनि सफल हुन नसकेको राजनीतिकर्मी एवम् समाजसेवी देवनारायण यादवले बताउनुभयो । चमार बस्तीका बासिन्दाको पीडा देखेर मन कटक्क दुख्ने गरेको उहाँले बताउनुभयो । तिरहुत गाउँपालिकाका अध्यक्ष मनोज बहरखेर यादवले यसबारेमा आफूलाई जानकारी नभएको तर अब वडाध्यक्षसँग समन्वय गरी तत्काल पहल थाल्ने बताउनुभयो ।

अन्तिम अपडेट: मंसिर ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

शुभनारायण यादव

शुभनारायण यादव सप्तरीका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्