नागरिकले आवश्यकताभन्दा १० गुणा धेरै सिटामोल किनेर घरमा थुपार्दा अभाव भयाे : औषधि उत्पादक सङ्घ

माघ ११, २०७८ मंगलबार १८:५०:४५ | उज्यालो सहकर्मी

काठमाण्डाै – नेपाल औषधि उत्पादक सङ्घले नागरिकले आवश्यकताभन्दा १० गुणा धेरै सिटामोल घरघरमा सञ्चय गरेर राखेकाले अभाव देखिएको दाबी गरेको छ ।

बजारमा औषधिको अभाव भएको अफवाह फैलिएकाले बिरामी भए खान पाइँदैन कि भन्ने डरले मानिसले आवश्यकताभन्दा धेरै औषधि किनेर घरमा थुपारेकाले औषधिको अभाव देखिएको सङ्घले आज मङ्गलवार विज्ञप्ति निकालेर स्पष्ट पारेको हो । सरकारले आफ्ना उद्योग र आफ्ना क्षमताकाे बारेमा जनस्तरमा विश्वस्त पार्न नसकेको कारणले यो अवस्था सिर्जना भएको सङ्घले जनाएको छ ।

अहिले केही सञ्चारमाध्यमले नेपालमा बन्ने पारासिटामोल लगायतका उत्पादन बजारमा अभाव भएको भन्ने समाचारप्रति पनि सङ्घले आफ्नो गम्भीर ध्यानाकर्षण भएको जनाएको छ । कोरोनाका कारण अहिले बजारमा सामान्य अवस्थामा भन्दा औषधिको धेरै माग रहेको छ । तर औषधिको मौज्दात नभएर वा उत्पादन क्षमता नभएर यस्तो अवस्था नआएको र हल्लाको पछाडि नलाग्न सङ्घले आग्रह गरेको छ । सङ्कटको अवस्थामा कुनै पनि औषधिको अभाव हुन नदिने प्रतिबद्धता सङ्घले गरेको छ ।

पारासिटामोल नेपाली बजारमा वार्षिक झन्डै सात करोड चक्की माग हुने गरेकोमा झन्डै ९९ प्रतिशत नेपालमा नै उत्पादन हुन्छ ।

‘अहिले नेपालमा पारासिटामोल र यसको कच्चा पदार्थ मौज्दात चाहिँदाे मात्रामा माैज्दात रहेको सङ्घले जनाएको छ । विश्व बजारमा कच्चा पदार्थको मूल्य अत्यधिक बढेको भए पनि उपलब्धता रहेको अवस्था भएकाले आतिने अवस्था छैन । अहिलेकाे परिस्थितिमा कुनै पनि औषधिको अभाव नभएको अवगत गराउन चाहन्छौँ । नेपाल औषधि लिमिटेड बाहेक हाम्रा स्वदेशी उद्योगहरूले पुस महिनामा झन्डै ४३ लाख पारासिटामोल ५०० मिलिग्राम चक्की बजारमा पठाएका छौँ । माघ महिनाको दोस्राे हप्तामा ३५ लाख र यो महिनाको अन्त्यसम्म अर्को ३५ लाख गरी ७० लाख चक्की बजारमा पठाउने लक्ष्य लिएका छौँ । हामीसँग आजकै दिनको पारासिटामोल उत्पादन गर्ने कच्चा पदार्थको मौज्दात हेर्दा झन्डै १९ हजार चार सय ६० किलोग्राम रहेको छ र यसले झन्डै तीन कराेड ८४ लाख ८३ हजार नाै सय पारासिटामोल ५०० मिलिग्राम चक्की बनाउन सकिन्छ’, विज्ञप्तिमा भनिएकाे छ ।

अन्तिम अपडेट: पुस ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्