र्‍याफ्टिङलाई राष्ट्रिय खेलमा समावेश गर्ने तयारीमा सरकार

फागुन २६, २०७८ बिहीबार १६:१०:२ | उज्यालो सहकर्मी

नुवाकाेट – युवा तथा खेलकुद मन्त्री महेश्वरजङ्ग गहतराजले र्‍याफ्टिङलाई राष्ट्रिय खेलमा समावेश गर्ने तयारीमा सरकार रहेको बताउनुभएको छ । आज बुधवार त्रिशूली नदीमा भएको १९ औँ हिमालय राष्ट्रिय र्‍याफ्टिङ च्याम्पियनशिप प्रतियोगिता कार्यक्रममा बोल्दै मन्त्री गहतराजले राष्ट्रिय खेलमा समावेश गर्ने विषयमा मन्त्रालयले राष्ट्रिय खेलकुद परिषद्सँग छदफल गरिरहेको बताउनुभयो । उहाँले खेललाई मनोरञ्जनको रूपमा मात्रै नभएर उद्यमसँग जोड्नुपर्ने आवश्यकता रहेको औँल्याउनुभयो ।

नेपाललाई समृद्ध बनाउने महत्त्वपूर्ण आधार भनेकै प्रकृति र संस्कृतिको प्रयोग भएको भन्दै मन्त्री गहतराजले र्‍याफ्टिङ खेल प्रकृतिसँग जोडिएकाले गुरुयोजनाको रूपमा विकास गर्नुपर्ने बताउनुभयो । र्‍याफ्टिङ लगायत अन्य जलाशययुक्त खेलमा काठमाण्डाेबाट नजिकमा रहेका त्रिशूली, सुनकोसी र भेटेकाेसीलाई कसरी प्रयोग गर्ने भन्ने विषयमा अध्ययन गर्ने उहाँले बताउनुभयो ।
मन्त्री गहतराजले र्‍याफ्टिङ जस्ता पानीमा खेल्ने अन्य खेललाई सरकारले लगानी बढाउनुपर्ने बताउनुभयो ।

उहाँले भन्नुभयो, ‘नेपाल जलस्रोतको हिसाबले विश्वको दोस्रो धनी राष्ट्र हो । प्राकृतिक हिसाबले विश्वको १७ औँ धनी राष्ट्रमा पर्छ । र्‍याफ्टिङलाई राष्ट्रिय खेलमा समावेश गर्न सरकार र राष्ट्रिय खेलकुद परिषद्सँग छलफल गरेर अगाडि बढ्छौँ ।’

कार्यक्रममा नेपाल पर्यटन बोर्डका प्रमुख कार्यकारी निर्देशक (सीईओ) डा. धनञ्जय रेग्मीले र्‍याफ्टिङ एक साहसिक खेल भएकाले खेलाडीको क्षमता विकास गर्दै जानुपर्ने बताउनुभयो । उहाँले र्‍याफ्टिङ खेलाडीको क्षमता विकासका लागि पर्यटन बोर्डले आर्थिक सहयोग गर्दै आएको र आउँदा दिनमा पनि निरन्तरता दिने प्रतिबद्धता जनाउनुभयो । डा. रेग्मीले धेरै देशले नेपालको सिको गरिरहेको बताउनुभयो । उहाँले नेपालमा र्‍याफ्टिङ गर्ने सक्ने नदीहरूलाई राम्रोसँग प्रयोग गर्न नसकेको दाबी गर्नुभयो ।

त्यस्तै पर्यटन अभियन्ता मेघ आलेले त्रिशूली नदीमा कोरोना महामारीपछिको पहिलो (१९ औँ) हिमालय राष्ट्रिय र्‍याफ्टिङ च्याम्पियनशिप भएको बताउनु भयो । उहाँले त्रिशूली नदीबाट र्‍याफ्टिङ मात्रै नभएर रिभर पर्यटनको सुरुवात भएको बताउनुभयो । तर अहिले त्रिशूली नदीमा रिभर पर्यटनका लागि अरबाैँ रुपैयाँकाे लगानी भए पनि र्‍याफ्टिङका लागि महत्त्वपूर्ण ठाउँमा विद्युतीय ड्याम बनाउने योजनाले समस्या आएको बताउनुभयो । र्‍याफ्टिङ क्षेत्रमा सुपर त्रिशूली हाइड्रोपावर बनाउनु उचित नभएको उहाँले तर्क गर्नुभयाे ।

कार्यक्रममा र्‍याफ्टिङ खेलाडी हरि आलेले त्रिशूली नदीको संरक्षण नभएर नदीलाई दूषित बनाउने काम भएकाले र्‍याफ्टिङ गर्ने वातावरण नभएको बताउनुभयो । उहाँले र्‍याफ्टिङ क्षेत्रमा विद्युतीय ड्याम बनाउने काम भइरहेकाले र्‍याफ्टिङ खेलाडीको भविष्य नै समाप्त हुने गुनासाे गर्नुभयाे ।

अन्तिम अपडेट: पुस २, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्