पर्वतमा प्रशासनले तोकेकाे मितिभित्र एक जनाले मात्रै बुझाए हतियार

वैशाख २, २०७९ शुक्रबार ९:१४:१९ | सन्तोष थापा

पर्वत - जिल्ला प्रशासन कार्यालय पर्वतले झन्डै २० दिनको समयावधि तोकेर इजाजत प्राप्त हतियार बुझाउन आग्रह गरे पनि एक जनाले मात्रै तोकिएको समयमा हतियार प्रहरीमा बुझाएका छन्।

आसन्न पालिका चुनावलाई लक्षित गर्दै जिल्ला प्रशासन कार्यालय पर्वतले गएकाे चैत ७ गते सूचना जारी गर्दै चैत २५ गतेसम्म बुझाउन अनुरोध गरे पनि पर्वतमा एक जनाले मात्रै हतियार बुझाएका हुन्।

द्वन्द्व व्यवस्थापन पछि गाउँगाउँमा रहेका अवैध हतियारलाई वैधानिकता दिन जिल्ला प्रशासन कार्यालय पर्वतले विभिन्न प्रकृतिका ७५ थान हतियारलाई कानुनी दायरामा ल्याएर दर्ता गराए पनि अहिले एक जनाले मात्रै हतियार बुझाएका हुन् ।

आउँदाे वैशाख ३० गते पालिका चुनावको मिति घोषणा भएको र चुनावलाई लक्षित गर्दै इजाजत प्राप्त गरेका हातहतियार बुझाउन आग्रह गरिएको थियो । सहायक प्रमुख जिल्ला अधिकारी मोहन बहादुर थापाले इजाजत प्राप्त हातहतियारहरु चुनाव सम्पन्न पश्चात् उहाँहरुलाई नै फिर्ता गर्ने गरी हातहतियार धनीहरुलाई नजिकको प्रहरी इकाईमा बुझाउन अनुरोध गरिएको बताउनुभयो ।

जिल्ला प्रशासन कार्यालयले हातहतियार खरखजाना ऐन, २०१९ को दफा ८ बमोजिम जिल्लामा विभिन्न व्यक्तिहरुसंँग रहेका इजाजतपत्र प्राप्त हातहतियारहरु चैत २५ गतेभित्र स्थानीय प्रहरी कार्यालयहरुमा अनिवार्य रुपमा बुझाउन आग्रह गरेको थियो । तर जिल्ला प्रहरी कार्यालय पर्वतका प्रहरी निरीक्षक राजेन्द्र अधिकारीका अनुसार एक जनाले मात्रै हातहतियार बुझाएका छन् ।

प्रहरी निरीक्षक अधिकारीले हातहतियार नबुझाउने व्यक्तिहरुलाई ७ दिनको समयावधि तोकेर बुझाउन अनुरोध गर्ने तयारी गरिएको र तोकिएको मितिमा हतियार नबुझाएमा कानुन बमोजिम कारबाहीकाे प्रक्रिया अघि बढाइने बताउनुभयो ।

पर्वतमा दर्ता गराएका ७५ थान हातहतियार मध्ये दुई जना जिल्ला बाहिरका व्यक्तिहरुले पर्वतमा हातहतियार दर्ता गराएका हुन् । हातहतियार दर्ता गराएर हरेक वर्ष नवीकरण गर्नुपर्ने प्रावधान रहे पनि जिल्ला प्रशासन कार्यालय पर्वतमा नवीकरणको यथेष्ट तथ्याङ्क छैन । नवीकरण गर्दा जुनसुकै जिल्लाबाट पनि गर्न सकिने भएकाले नवीकरणको विवरण अद्यावधिक हुन नसकेको मुद्दा शाखाका कर्मचारी रामचन्द्र गौतमले जानकारी दिनुभयो ।

अन्तिम अपडेट: मंसिर १, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

सन्तोष थापा

पर्वतका उज्यालो सहकर्मी सन्तोष थापा त्यहाँको स्थानीय पत्रिकामा पनि काम गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्