काठमाण्डौ – राज्यमन्त्री उमेश श्रेष्ठले सरकार सञ्चालन प्रणालीको कमजोरीका कारण राष्ट्रिय गौरवका आयोजना समयमै नसकिएको दाबी गर्नुभएको छ । 

आज बुधवार बसेको राष्ट्रिय सरोकार तथा समन्वय समितिको बैठकमा राज्यमन्त्री श्रेष्ठले यस्तो बताउनुभएको हो । उहाँले सरकारको नीति, नियमको प्रणालीमा भएको कमजोरीले समयमै काम नसकिने गरेको बताउनुभयो । 

राज्यमन्त्री श्रेष्ठले नीति, नियमको कमजोरीका साथै ढिलासुस्ती र ठेकेदारको काममा ढिलाइ हुँदा यो अवस्था सिर्जना भएको बताउनुभयो । राष्ट्रिय गौरवका आयोजनाले देशको उन्नति, प्रगतिलाई टेवा पु¥याउने भन्दै समयमै काम सकिनुपर्ने उहाँको भनाइ छ । 

उहाँले भन्नुभयो, ‘हाम्रो देशमा किन काम हुँदैनन्, किन ढिलो हुन्छ ? दुई वर्षमा हुने काम किन आठ वर्ष लाग्छ ? मलाई के लाग्छ भने यो हाम्रो प्रणालीको कमजोरी हो । प्रधानमन्त्री अफिसमा सीसीटीभी क्यामेरा राखेर त्यसको प्रगति कति हो ? त्यो नियाल्नुपर्छ । राष्ट्रिय गौरवको आयोजना समयमै सक्नुपर्छ ।’

राज्यमन्त्री श्रेष्ठले समयमै काम सक्ने कुरामा कर्मचारीको सरुवा पनि बाधक बन्ने गरेको उल्लेख गर्नुभयो । उहाँले यसलाई सहजीकरण गर्न र नेपाललाई समृद्ध बनाउन सरकार र प्रधानमन्त्री कार्यालय लागिपरेको बताउनुभयो ।