चितवन मेडिकल कलेजमा एक सय शय्याकाे क्यान्सर अस्पताल सञ्चालन हुने

साउन २६, २०७९ बिहीबार १०:२२:२५ | राधेश्याम खतिवडा

चितवन - चितवन मेडिकल कलेज शिक्षण अस्पतालले अत्याधुनिक उपकरणसहित एक सय शय्याको क्यान्सर अस्पताल सञ्चालनको तयारी गरेको छ । दुई अर्ब रुपैयाँ लगानीमा क्यान्सर अस्पताल सञ्चालन गर्न लागिएको अस्पतालले जानकारी दिएको हाे ।

क्यान्सर उपचारका लागि चितवन मेडिकल कलेजको शिक्षण अस्पतालसँगै ६ तले भवन निर्माण गरिएको छ । क्यान्सर उपचारका क्रममा विकिरणहरु बाहिर नजाओस् भन्नका लागि विशेष सतर्कता अपनाइएको छ। अन्तर्राष्ट्रिय मापदण्ड अनुसार बङ्कर निर्माण गरिएको र परीक्षण सफल भएको उहाँले बताउनुभयो ।

एक महिना भित्रमा सञ्चालनमा ल्याउने गरी अस्पतालले आफ्नो भगिनी संस्थाको रुपमा “सीएमसी क्यान्सर इन्स्टिच्युट” निर्माण गरेको अस्पतालका निर्देशक डा. दयाराम लम्सालले बताउनुभयो । नेपालका क्यान्सरका बिरामी अब दक्ष जनशक्ति र आधुनिक उपकरणको अभावमा विदेश जानु नपर्ने बताउँदै डा. लम्सालले विदेशका अस्पतालमा जडान गरिएका आधुनिक उपकरणहरु यहाँ जडान भएको जानकारी दिनुभयो ।

उपकरणहरु खरिदमा मात्रै १ अर्ब २७ करोड रुपैयाँ खर्च भएकाे जानकारी दिँदै उहाँले अन्य उपकरण र भौतिक पूर्वाधारमा गरी क्यान्सर इन्स्टिच्युटमा दुई अर्ब रुपैयाँभन्दा बढी खर्च लाग्ने बताउनुभएको छ ।

रेडिएसनसँगै ब्राकी थेरापी, स्पेक्ट सिटी स्क्यान, बोनम्यारो प्रत्यारोपण, रक्त क्यान्सरको उपचार, बाल क्यान्सरको उपचारसहित सबै खालका क्यान्सरको उपचार हुने अस्पतालले जानकारी दिएको छ ।

विदेशका ठूला अस्पतालमा कामको अनुभव लिएका चिकित्सकहरुसँग सम्झौता गरिरहेकाे बताउँदै डा. लम्सालले दक्ष जनशक्तिमार्फत गुणस्तरीय स्वास्थ्य उपचार गर्नेगरी व्यवस्थापन गरिएको जानकारी दिनुभयो । क्यान्सरका बिरामीलाई लामो समय पालो कुर्नु पर्ने र विदेश जानु पर्ने बाध्यताको अन्त्य गर्न क्यान्सर इन्स्टिच्युट सुरु गरेको उहाँले बताउनुभयो । दैनिक एक सय जनासम्मलाई रेडिएसन सेवा दिन सकिने प्रविधि जडान गरिएको उहाँले बताउनुभयो । रेडिएसन लिन्याक एक्सिलेरेटर जडान गरिएको हो ।

चितवन मेडिकल कलेज शिक्षण अस्पतालले अहिले वार्षिक ३ लाख ५० हजारभन्दा बढी बिरामीलाई सेवा दिँदै आएको छ । अस्पतालमा २८ विभाग रहेका छन् । जहाँ अङ्ग प्रत्यारोपणसहित अति विशिष्टिकृत सेवा रहेका छन् । क्यान्सरका बिरामीलाई अन्य विभागको सेवा समेत आवश्यक पर्ने भएकोले बिरामीले उपचारमा सहजता पाउने अस्पतालले जनाएको छ ।

अन्तिम अपडेट: मंसिर ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

राधेश्याम खतिवडा

राधेश्याम खतिवडा उज्यालोका चितवन सहकर्मी र नेपाल पत्रकार महासंघ चितवन शाखाका पूर्व अध्यक्ष हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्