काठमाण्डौमा बालेनको ‘एक्सन’ : घरधनी र व्यापारी आक्रोशित, अरु नागरिक उत्साहित

भदौ १०, २०७९ शुक्रबार ९:४०:४२ | वैद्यनाथ पाैडेल

काठमाण्डौ - काठमाण्डौ महानगरपालिकाका मेयर बालेन्द्र शाहको पछिल्लो ‘एक्सन’ले घरधनी र व्यापारी झस्किएका छन् । राजनीतिक दलका नेता कार्यकर्ता प्रायः मौन छन् भने अरु धेरै नागरिक मेयर शाहले राम्रो काम गरेको भन्दै उत्साहित भएका छन् ।

हातमा सम्बन्धित घरको नक्सा र महानगरको ३५ दिने सूचना बोकेर मेयर शाह दिनहुँ डोजर लिएर आफैँ मैदानमा उत्रनुभएको छ । इञ्जिनियरिङ विषयमा जानकारसमेत भएकाले उहाँलाई नक्सा विपरीत बनेको संरचना पत्ता लगाउन र उतिखेरै ‘एक्सन’मा उत्रन सजिलो भएको छ ।

अवैध संरचना भत्काउनुअघि महानगरले ३५ दिने सूचना निकालेको थियो । तर घरधनी र व्यापारीले यो सूचनालाई बेवास्ता गरे । कतिपय व्यापारी भने ३५ दिने सूचना थाहा नभएको बताउँछन् ।

काठमाण्डौ मलमा फेन्सी पसल चलाउने व्यापारी उमेश यादव महानगरले कुनै सूचना नै नगरि एक्कासी डोजर लिएर आएर पसल भत्काएको भन्दै आक्रोशित हुनुहुन्छ । दशैँको मुखमा आएर आफ्नो ५० लाखको नोक्सानी गरेकोमा त्यसको क्षतिपूर्ति कसले दिने हो भनेर प्रश्न गर्नुहुन्छ यादव । उहाँ भन्नुहुन्छ, ‘भत्काउने नै भए कमसेकम सूचना त दिनुपर्छ । हामीलाई केही थाहै छैन । एक्कासी डोजर ल्याएर हान्न थाल्यो । सामान पनि झिक्न पाएन । यो कस्तो अन्याय हो ।’

व्यापारीहरुले आफूहरुलाई विना कुनै जानकारी तथा सूचना भत्काएको भन्दै विरोध गरिरहे पनि अरु नागरिक भने महानगरको कदमबाट उत्साहित छन् । बुधवार काठमाण्डौ मलको अवैध संरचनामा डोजर चलिरहँदा पुल्चोककी सरु नगरकोटी पनि त्यहीँ हुनुहुन्थ्यो ।

‘मान्छे हिँड्ने ठाउँ नै नहुनेगरी यसरी अवैध निर्माण गर्न पाइन्छ ?’ उहाँको प्रश्न छ, ‘उता रोड छ यता फुटपाथमा हिँड्ने ठाउँ छैन । अब हामी कहाँबाट हिँड्ने ?’ उहाँ अगाडि थप्नुहुन्छ, ‘यो गरेर जनतालाई केही सहयोग नै भएको हो । यो एकदमै भिड हुने ठाउँ हो । नागरिकलाई हिँड्ने ठाउँ पनि त चाहियो नि । मलाई चाहिँ यो ठिक लाग्यो ।’

महानगरले डोजर लगाएर भत्काएपछि खुला तर कुरुप देखिएको काठमाण्डौ मल अगाडि उभिइरहनु भएका विक्रम अधिकारी विदेश जाने तरखरमा हुनुहुन्छ । उहाँ २०७२ सालको भूकम्पपछि सुन्धारा कस्तो भएछ भनेर हेर्न निस्कनु भएको हो । नयाँ बनेको धरहरा अनि त्यसै परिसरमा बन्दै गरेका अन्य संरचना हेर्दै अगाडि बढ्ने क्रममा उहाँका आँखा काठमाण्डौ महानगरले डोजर लगाएर असरल्ल रहेको काठमाण्डौ मलमा पर्यो ।

काठमाण्डौ महानगरले किन भत्काएछ भनेर जिज्ञासा राख्दा धेरैले नक्सा पास नगरि बनाएको गैरकानुनी संरचना हुनाले महानगरले भत्काएको भन्ने उत्तर पाएपछि उहाँलाई महानगरले ठिकै गरेको भन्ने लाग्यो ।

‘यो सरकारी जग्गा हो । सरकारी जग्गा अतिक्रमण गरी बनाएका टहरा गलत हो । त्यसकारण भत्काउनु जायज हो भन्छु म । सरकारी जग्गा हो । यसरी बनाउनु हुँदैन,’ उहाँ भन्नुहुन्छ, ‘जे गर्यो सरकारले राम्रैका लागि गर्यो । राम्रो गर्यो भन्ने मेरो धारणा । मेरो विचार ।’

महानगरले अन्यत्रको अवैध संरचनासमेत भत्काउन लागिरहेकोमा त्यहाँ रहेका पसल तथा व्यापारिक गृहलाई जानकारी दिएर मात्र यस्ता संरचना भत्काउनु पर्ने उहाँको विचार छ । अधिकारी भन्नुहुन्छ, ‘जति पनि व्यापार, व्यवसायहरु गर्नु भएको छ उहाँहरुलाई जानकारी दिएर क्षति नहुने तरिकाले भत्काउँदा राम्रो हुन्छ ।’

काठमाण्डौ मलमा भिड बढेसँगै के भएछ भनेर हेर्न आउनु भएका छ नेपाल वायुसेवा निगममा काम गर्ने वीरबहादुर तामाङ । काठमाण्डौ मलको कुरुप चित्र हेर्दै बस्नु भएका तामाङलाई पनि यसरी अवैध संरचना भत्काएको ठिक लागेको छ । उहाँ भन्नुहुन्छ, ‘बाटो च्यापेर बनाएको जहाँ पनि भत्काएको राम्रो लाग्यो ।’

काठमाण्डौ महानगरले नक्सा पास नगरि बनाएका संरचना वा नक्सा एकाथरी अनि उपयोग अर्कोथरी रहेका अवैध संरचना भत्काउन सुरु गरेको हो । महानगरले गएको साउन १ गते ३५ दिने सूचना जारी गर्दै घर तथा भवन निर्माण गर्दा नक्सा पास भए बमोजिम प्रयोग गर्न निर्देशन दिएको थियो । महानगरले यो सूचना विशेष गरी अण्डरग्राउन्ड पार्किङका लागि नक्सा पास गर्ने तथा त्यस विपरीत पार्किङका लागि प्रयोग नगरि पसल तथा अन्य व्यापारिक प्रयोजनमा लगाउनेका विरुद्ध थियो ।

अन्तिम अपडेट: मंसिर ६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

वैद्यनाथ पाैडेल

वैद्यनाथ पाैडेल उज्यालाे सहकर्मी हुनुहुन्छ ।

1 Comments

शारदा प्रसाद भट्टराई
Aug. 26, 2022, 11:07 a.m.
अब हामी जो कोहि पनि भाडा मा बेपार गर्नको लागि सम्झौता पत्र बनाउदा घर धनिसंग नक्सामा बुझेर मात्रै सम्झौता गर्नु नै बेस , अनि अर्को कुरा यस्तो कदम चाल्दा खेरि नगरपालिका या सरकारी कार्यालय जहाँवाट नक्सा प्राप्त हुन्छ सो निकायले नक्सामा भये बमोजिम मात्रै हेरेर प्यान नं दिने भए यो समस्या आफै हल हुने थियो ।यस्तो गर्दा एक बर्स मा सबै आफै समधान हुने थियो ।कहि कसैको मा गयेर घर भत्काउनु पर्दैन न त कसैसंग दुस्मनि हुने थियो ।म शारदा प्रासद भट्टराई अहिले कतारवाट
0 Reply

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

काठमाण्डौमा बालेनको ‘एक्सन’ : घरधनी र व्यापारी आक्रोशित, अरु नागरिक उत्साहित

1 Comments

शारदा प्रसाद भट्टराई

तपाईको प्रतिक्रिया

तपाईको प्रतिक्रिया