काठमाण्डाै – ललितपुर महानगरपालिकाका मेयर चिरीबाबु महर्जनले काठमाण्डौ उपत्यकामा अब मेट्रोको विकल्प नरहेको बताउनुभएको छ । 

शनिवार ललितपुर महानगरपालिकाको १०४ औं स्थापना दिवसका अवसरमा बोल्दै उहाँले काठमाण्डाै उपत्यकामा अब मेट्रोको विकल्प नरहेको बताउनुभएको हो । उहाँले मेट्रो रेल धेरै महंगो छ भनेर पछि हट्नु नहुने बताउनुभयो । उहाँले अब पनि मोटरसाइकल ल्याएर उपत्यकामा ट्राफिक जाम बढाउनु भन्दा मेट्रो रेल सञ्चालनका लागि आवश्यक तयारी थाल्नुपर्ने बताउनुभयो ।

उहाँले मेट्रो रेलको विकल्प मोेटरसाइकल किमार्थ हुन नसक्ने दाबी गर्दै उपत्यकामा मेट्रोको विकल्प नै रहेको बताउनुभयो । मेयर महर्जनले अन्तर्राष्ट्रिय अध्ययन अनुसार पनि ३० लाख जनसंख्या भएको ठाउँका लागि मेट्रो अपरिहार्य रहेको भन्दै ढिलाे नगरी मेट्रोको आवश्यक तयारी गर्नुपर्ने बताउनुभयो ।

उहाँले मेट्रो रेलको लागि सरकारको अनुहार हेरेर कहिल्यै सम्भव नहुने भन्दै काठमाण्डाै र ललितपुर महानगरपालिका लगायत काठमाण्डाै उपत्यकाका १८ वटा पालिकाको राम्रो भुमिका यसमा हुनुपर्ने बताउनुभयो । उहाँले विशेष गरी मेट्रो रेल सञ्चालनका लागि काठमाण्डाै महानगरपालिकाले प्रमुख भूमिका खेल्नुपर्ने बताउनुभयो । 

उहाँले भन्नुभयो, ‘काठमाण्डाै उपत्यकामा अब मेट्रोको विकल्प छँदै छैन । मेट्रो चलाउनैपर्छ । आज निर्णय गर्नसक्यौँ भने अर्को १० देखि १५ वर्षसम्ममा त्यो सकिन्छ । मेट्रो ज्यादै महंगो छ रे भन्ने सुन्ने गरेको छु । सस्तो के त ? सस्तो पनि त हुनुपर्छ । अबको १५ वर्षपछि काठमाण्डाै उपत्यका भित्रको जनसंख्या ६० लाख पुग्छ । यसको विकल्प के त ? यही मोटरसाइकल ल्याउने ? तसर्थ यो विकल्प किमार्थ हुन सक्दैन । यसको निमित्त हामीले मेट्रो नल्याइकन सुखै छैन । महंगो भयो भनेर वास्तै नगर्ने ? यो हुँदैन । कुनै पनि योजना बनाएर भए पनि मेट्रो ल्याउनैपर्छ । यसको लागि नेपाल सरकारको अनुहार हेरेर बस्ने हो भने केही पनि हुँदैन । त्यसको लागि काठमाण्डाै र ललितपुर महानगरपालिका लगायत काठमाण्डाै उपत्यकाका १८ वटा पालिकाको राम्रो भूमिका खेल्नुपर्छ । त्यसमा काठमाण्डाै महानगरपालिका प्रमुख हो । यमसा अघि बढौँ ।’ 

मेयर महर्जनले आफ्नो दोस्रो कार्यककालमा अझै बढी काम गरेर देखाउने दाबी पनि गर्नुभयो ।