काठमाण्डाै – नेपाली कांग्रेसका प्रवक्ता डा. प्रकाशशरण महतले राजनीति आवश्यकताको सिद्धान्तले चल्ने बताउनुभएको छ । 

आज मङ्गलवार दिउँसो काँग्रेस संसदीय दलको कार्यालय सिंहदरबारमा देउवाको समर्थनमा पुग्नुभएका प्रवक्ता महतले राजनीति आयुको सिद्धान्तबाट नभइ आवश्यकताको सिद्धान्तले चल्ने भएकाले अहिलेको आवश्यकता शेरबहादुर देउवा संसदीय दलको नेतामा चयन हुनु रहेको बताउनुभएको हो । उहाँले कुनै पनि दलले बहुमत नल्याएको अवस्थामा परिपक्व नेतृत्वको आवश्यकता रहेको बताउनुभयो । अन्य दलहरूसँग मिलेर सरकार बनाउनुपर्ने आवश्यकता भएकाले त्यो गुण, कला र अनुभव देउवासँग मात्रै रहेको उहाँकाे भनाइ छ ।  

उहाँले भन्नुभयो, ‘राजनीति आवश्यकताकाे सिद्धान्तले चल्छ, आयुको सिद्धान्तमा चल्दैन । कोही बारम्बार हुन्छन्, कोही हुँदै हुँदैनन् । परिपक्व नेतृत्वको आवश्यकता छ । देशले खोजेको नेतृत्व हामीले प्रस्तुत गर्ने हो । कांग्रेसको मात्रै बहुमत छैन, हामीले अन्य दलहरूलाई पनि जोडेर सरकार बनाउनु छ । त्यो जोड्ने गुण उहाँ (देउवा) मा छ, उहाँ पटक–पटक त्यसै हुनुभएको होइन ।’ 

कांग्रेस संसदीय दलको नेताका लागि पार्टी सभापति एवम् प्रधानमन्त्री शेरबहादुर देउवा र महामन्त्री गगनकुमार थापाले उम्मेदवारी दर्ता गराउनुभएको छ ।