डाेटी – डोटीको बोगटान फुड्सिल गाउँपालिका–२ गराजु गाउँ झिलिमिली भएको छ । यसअघि अन्धकारमा बस्दै आएका स्थानीय बासिन्दा सोलार मिनिग्रीडबाट बत्ती बाल्न पाउँदा खुसी भएका छन् ।

धेरैजसो घरपरिवार उज्यालोको लागि झुरो अर्थात् (सल्लाको काठ) मा निर्भर थिए । केन्द्रीय प्रशारण लाइनको पहुँच पुग्न अझै केही वर्ष लाग्ने भएकाले गराजु गाउँका बासिन्दालाई सोलार मिनिग्रिडबाट विद्युत् आपूर्तिको प्रबन्ध गरिएको गाउँपालिकाका प्रमुख प्रशासकीय अधिकृत भरतबहादुर चन्दले बताउनुभयो ।

सुदूरपश्चिम प्रदेश सरकारको ९० प्रतिशत र गाउँपालिकाको १० प्रतिशत आर्थिक सहयोग तथा जर्मन सहयोग नियोग (जिआइजेड)को नवीकरणीय ऊर्जा तथा ऊर्जा दक्षता कार्यक्रम (रिप)को प्राविधिक सहयोग गरी झण्डै दुई करोड २० लाख रुपैयाँको लागतमा सोलार मिनिग्रिड परियोजना सम्पन्न भएको हो । बिजुलीको सुविधा पुगेपछि रातीको समयमा पनि उज्यालोमा घरायसी कामधन्दा गर्न, बालबालिकालाई पढ्न तथा मोेबाइल चार्ज गर्न, रेडियो टेलिभिजनजस्ता सञ्चारका साधनको प्रयोग गर्न सहज भएको स्थानीयबासिन्दा नरबहादुर बोहराले बताउनुभयो ।