एक हजारको चामल गाउँ पुग्दा चार हजार !

असोज २४, २०७५ बुधबार १४:१३:५० | सिताराम अधिकारी

धादिङ –उत्तरी धादिङको लापा, झर्लाङ, रि, सेर्तुङ र तिप्लिङवासी यातायातको जोखिमपूर्ण र महंगो सेवा उपभोग गर्न बाध्य छन् ।

सडक सञ्जाल नपुगेको र खच्चडबाट सामान ढवानी गर्नु पर्ने भिर पहराको छेउमा भएका बस्तीहरुका मानिस सदरमुकाममा सामान्य उपचार सेवा लिन जाँदा कम्तिमा एक साता लाग्ने गर्छ । बोकेर लानु पर्ने अवस्था आएमा बिरामीहरु गाउँमै अलपत्र पर्ने र साहुहरुले मात्र हेलिकप्टरमा चार्टर गरेर अस्पताल लैजानुपर्ने अवस्था छ । यस्तो जोखिमपूर्ण यात्रा गर्दा उत्तरी धादिङका मानिसहरुको जीवन नै जोखिममा रहेको लापाका निरबहादुर तामाङको भनाइ छ ।

सदरमुकामबाट साविकको दार्खा गाविससम्म सवारी साधन ‘गाडी’ पुगेको भए पनि वर्षका बेला सदरमुकामबाट अवरुद्ध भएको बाटो दसैँका बेलामा समेत डुण्डुरे खोलासम्म पनि कच्ची सडक सञ्चालनमा आउन सकेको छैन । किन्ताङफेदीबाट खच्चडमा सामान ढुवानी गरेर लापा पुर्याउँदा एक बोरा एक हजार मूल्य पर्ने चामलको कम्तिमा ३ हजार ५ सय रुपैयाँसम्म पर्छ । विद्यालय बनाउन वा स्वास्थ्य चौकी बनाउन सिमेन्ट आवश्यक हुन्छ ।

सिमेन्ट बोकेर भवन बनाउन सदरमुकामको तुलनामा चार गुणाले महंगो पर्ने भएपछि गाउँमा मानिसहरु सामान्य जीविका मात्र धानेर बस्न बाध्य भएको लापा निवासी रुबीभ्याली गाउँपालिका वडा नम्बर ५ का वडाअध्यक्ष धिरज तामाङले बताउनुभयो ।

लापा, झर्लाङ, रि, सेर्तुङ र तिप्लिङका विद्यालयहरु युएमएनको साझेदारीमा नमस्ते ग्रामिण विकास समाज र हिम्स नेपाल नामक गैरसरकारी संस्थाहरुले निर्माण गरिरहेका छन् । भूकम्पले क्षति पुर्याएका विद्यालय निर्माणमा ढुवानी समस्याका कारण समयमै निर्माण नसकेको र लागत मूल्य अत्यन्तै चर्को भएको हिम्स नेपालका अध्यक्ष जिवन तामाङले बताउनुभयो ।

खच्चडमा रड बोक्न कठिन हुने भएपछि रडलाई भाँचेर सानो पारेरमात्र बोकाउनु पर्ने हुन्छ । सिमेन्टको तुलनामा रड ढुवानी २० प्रतिशतले महंगो पर्ने गरेको छ ।
जोखिमका बस्ती भएर पनि गाउँमै बसोबास गरिरहेका नागरिकहरु दसैँको मुखमा हिँडेर ठूलो भारी बोकेर घरतिर जाँदै गरेको र दसैँ खर्च जुटाउन बजारतर्फ मानिसहरु भारी बोकेर पसिना निकालेको दृश्य टिठ लाग्दो देखिन्छ ।

पञ्चायतकालदेखि केही समयअघिसम्म लामो समय राज्यसत्ताको मूख्य पदमा सेर्तुङका बुद्धिमान तामाङ बसे तर गाउँमा सडक, बत्ती, स्वास्थ्य, शिक्षाका लागि पहल नगरेको गाउँबासीको आरोप छ । यस्तै आरोप लागाएर प्रदेशसभा र संघीयसभाको चुनावमा समेत यस क्षेत्रका नागरिकले पहिले सत्तामा बसेर पनि विकास नगरेकाहरुको विरुद्धमा भोट हालेको सेर्तुङ निवासी रामसिंह तामाङले बताउनुभयो ।

अहिले धादिङबेसी तिप्लिङ सडक ट्रयाक खोल्ने काम भइरहेको छ । यो सडक १२ महिना चल्ने भयो भने गाउँमा आर्थिक विकास हुने आशा गाउँवासीको छ ।

अन्तिम अपडेट: मंसिर ६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

सिताराम अधिकारी

धादिङका पत्रकार सिताराम अधिकारी उज्यालोका जिल्ला सम्वाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्