लेकै फुल्यो लालीगुराँस... (फोटोफिचर)

चैत ४, २०७९ शनिबार १३:५१:१५ | प्रताप बानियाँ

म्याग्दी – गुराँसको रङ्ग ओढेर दुलही झैँ सिंगारिएका छन् यतिबेला लेकाली वन । वसन्तको आगमनसँगै पलाएका पालुवा र त्यसैमाथि फुलेका गुराँसले पहाडको क्यानभासलाई रङ्गीन तुल्याएको छ ।

हिमाली जिल्ला म्याग्दीको वनपाखा पनि गुराँसमय बनेका छन् । फागुनको आगमनसँगै फुल्न थालेका गुराँस जेठसम्म ढकमक्क फुल्ने गर्छन् । बेनी नगरपालिकाको माथिल्लो क्षेत्रदेखि अन्नपूर्ण, रघुगंगा, मंगला, मालिका र धवलागिरि गाउँपालिकाको वन क्षेत्र लालीमय बनेका छन् ।

म्याग्दीका वनमा रातो, सेतो, गुलाफी र कलेजी रङका गुराँसहरु फुल्ने गर्दछन् । गण्डकी प्रदेशमा गुराँसको राजधानी भनेर म्याग्दीको घोडेपानी–पुनहिल र राम्चे क्षेत्रलाई चिनिन्छ । म्याग्दीमा पाइने १० प्रकारका गुराँसमध्ये यहाँको घोडेपानी क्षेत्रमा मात्रै विभिन्न ८ प्रजातिका गुराँसहरु फुल्ने गरेको डिभिजन वन कार्यालय म्याग्दीले जनाएको छ । म्याग्दी जिल्लामा अहिले कुल ३ सय १४ वटा सामुदायिक वनहरु रहेकोमा सबै वन क्षेत्रमा गुराँस प्रजातिका बोटविरुवा पाइने गरेका छन् ।

वनपाखामा गुराँस फुल्न थालेसँगै पर्यटकहरुको समेत चहलपहल बढेको छ । इलाका प्रहरी कार्यालय घोरेपानीका अनुसार पुनहिल–घोडेपानी र महरेडाँडा क्षेत्रमा दैनिक झण्डै ४० देखि ५० स्वदेशी र १ सय जनाको हाराहारीमा विदेशी पर्यटक आउने गरेका छन् ।

वसन्त ऋतुमा मनै लोभ्याउने गरी ढकमक्कै फुल्ने लालीगुराँसको साथैमा टाँसिएर फोटो, भिडियो खिच्न र सेल्फी लिन पर्यटकहरु पुग्ने गर्दछन् । वनपाखामा फुलेको लालीगुराँसलाई पृष्ठभूमीमा पारेर मोबाइलमा सेल्फी खिचेर रमाउन पाइने भएपछि म्याग्दीको घोडेपानी पुनहिल क्षेत्रमा पर्यटकहरुको आकर्षण बढेको छ ।

तर पछिल्लो समय जलवायु परिवर्तनको असर गुराँसमा पनि पर्न थालेको छ । डिभिजन वन कार्यालय म्याग्दीका सहायक वन अधिकृत चन्द्रमणि सापकोटाका अनुसार पछिल्लो समय जलवायु परिवर्तनका कारण समयभन्दा अगावै गुराँस फुल्न थालेका छन् । जलवायुको असर अन्य बिरुवाहरुमा पनि परेको छ ।

यसपटक हिउँदको समयमा वर्षा र हिमपात नहुँदा विगतको तुलनामा गुराँस कम फुलेको स्थानीयको अनुमान छ ।

वन तथा भू संरक्षण विभागका अनुसार नेपालका ४३ जिल्लाका वन जङ्गलमा कम्तीमा ३१ प्रजातिका गुराँसहरु पाइन्छन् । त्यसैमध्येको लालिगुराँस नेपालको राष्ट्रिय फूल हो । नेपालमा सबैभन्दा ठूलो लालीगुराँसको जङ्गल भनेर संखुवासभा, ताप्लेजुङ र तेह्रथुम जिल्लाको सङ्गमस्थलमा पर्ने तिनजुरे–मिल्के–जलजले (टिएमजे) संरक्षित क्षेत्रलाई मानिएको छ ।

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

प्रताप बानियाँ

म्याग्दीमा बसेर पत्रकारिता गर्ने प्रताप बानियाँ उज्यालोका जिल्ला सम्वाददाता हुनुहुन्छ । उहाँले मुस्ताङका खबर पनि सम्प्रेषण गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्