काठमाडौं – पूर्व राष्ट्रपति डा. रामवरण यादवले विद्रोही नेत्रविक्रम चन्द नेतृत्वको नेपाल कम्युनिष्ट पार्टीलाई मूलधारमा ल्याउन नसकेको भन्दै सरकार र राजनीतिक दलहरुको आलोचना गर्नु भएको छ । 

पूर्व राष्ट्रपति यादवले हिमाल, पहाड र तराईबीचको एकतालाई बलियो बनाउन कुनै पहल गर्न नसकेको भन्दै असन्तुष्टि पनि व्यक्त गर्नुभयो । शुक्रबार पत्रकार जगत नेपालको पुस्तक ‘बीपीको विद्रोह’को काठमाडौंमा विमोचन गर्दै उहाँले बीपीले देखाएको मेलमिलापको बाटोबाट अघि बढनुको साटो राजनीतिक दलहरु पदीय भागबण्डामा मात्रै केन्द्रित भएको गुनासो पनि गर्नुभयो ।

उहाँले नेपालका हरेक व्यवस्था परिर्वतनमा हडबडमा निर्णय लिँदा उपलब्धि संस्थागत हुन नसकेको बताउनु भयो । यादवले संविधान निर्माणको अन्तिम समयमा हडबड गर्दा सबै समेटिन नसकेको तर्क गर्नुभयो । कार्यक्रममा पूर्व राष्ट्रपति यादवले सरकारले असन्तुष्ट पक्षलाई समेट्न नसक्दा विद्रोहको स्वर बढ्दै गएको भन्दैे रोष व्यक्त गर्नुभयो ।

पूर्व राष्ट्रपति यादवले सबैले मिलेर मुलुकमा शान्ति स्थापना गर्न ढिलाई गर्न नहुनेमा पनि जोड दिनुभयो । उहाँले राज्यका संवैधानिक निकायमा पदीय बाँडफाँड भइरहेको भन्दै आपत्ति पनि जनाउनुभयो ।