अमेरिकाको क्यालिफोर्निया राज्यमा डढेलो अनियन्त्रित भएपछि दुई वटा काउन्टीले आपतकाल घोषणा गरेका छन् । बुधवारदेखि शुरु भएको डढेलो फैलने क्रम नरोकिएपछि बुट्टे र तेहामा काउन्टीमा आपतकालको घोषणा गरेको क्यालिफोर्नियाका गभर्नर गेभिन न्यूजमलाई उद्धृत गर्दै बीबीसीले जनाएको छ ।

अहिले प्रति घण्टा २० वर्गकिलोमिटर जङ्गल नष्ट गरिरहेको डढेलो निभाउन दुई हजार पाँच सय जनाभन्दा धेरै अग्नी नियन्त्रक र १६ वटा हेलिकोप्टर परिचालन भएका छन् । यस्तै कैयौं दमकल र ट्याङ्करले पानी हालेर आगो निभाउने प्रयास गरिरहेका बीबीसीको खबरमा उल्लेख छ ।

जङ्गलमा आगो लगाएको आरोपमा प्रहरीले एक जनालाई पक्राउ गरेको छ । ति व्यक्तिले बलिरहेको कार जङ्गलमा लगेर डढेलो लगाएको आरोप छ । आगो लागेको क्षेत्र बाक्लो घाँस भएको क्षेत्र रहेको र त्यहाँ प्रशस्त इन्धन रहेकाले निभाउन कठिन भइरहेको अग्नि नियन्त्रकले बताएका छन् । क्यालिफोर्नियामा वर्षेनि डढेलोका घटना हुने गरेका छन् । यसअघि सन् २०१८ मा डढेलोमा परेर कम्तीमा ८० जनाले ज्यान गुमाएका थिए ।