मनकामना मन्दिर भक्तजनका लागि खुल्ला

मंसिर १२, २०७५ बुधबार १३:२८:२८ | किरण लोहनी

गोरखा – एक महिना अघि पुनर्निर्माण सकिएको गोरखाको मनकामना मन्दिर बुधबारबाट भक्तजनका लागि खुल्ला गरिएको छ । मन्दिर जीर्ण भएपछि जगैदेखि भत्काइएकाे थियाे । मन्दिर भत्काइएपछि भक्तजनले मन्दिर परिसरमा स्थापना गरिएको मनकामनाको प्रतिमूर्तिमा पूजाआजा गर्दै आएका थिए ।

बुधबारबाट भक्तजनले नयाँ मन्दिरमै पूजाआजा गर्न थालेकाे जीर्णोद्वार समितिका संयोजक नरेन्द्रबाबु श्रेष्ठले जानकारी दिनुभयो । पुरानो हुँदै गएपछि मन्दिर पूर्व पश्चिम १६ सेन्टिमिटर र उत्तर दक्षिण पनि ५ सेन्टिमिटर भासिएको थियो । भूकम्पपछि थप जोखिममा परेको मन्दिरको पुनर्निर्माण पुरानै स्वरुपमा गरिएको छ ।

पुननिर्माणमा झण्डै १४ करोड रुपैयाँ खर्च भएको श्रेष्ठले जानकारी दिनुभयो । त्यसमध्येको ४ करोड रुपैयाँ सरकारले दिएको हो भने बाँकी १० करोड भक्तजनबाटै जुटाइएको हो । मन्दिरको छाना र गजुरमा सुन लेपनका लागि मात्रै १८ किलो सुन खर्च भएको श्रेष्ठले बताउनुभयाे । ‘१५ तोला जति सुन बचेको छ । केही पैसा पनि बचेको छ, हामी विशेष कार्यक्रम गरेर सबै हिसाब सार्वजनिक गर्छौं’ श्रेष्ठले भन्नुभयो, ‘नयाँ मन्दिर शुद्ध बनाउन माघमा दश कर्म पूजा गर्छौं, त्यही बेला सरोकारवाला बोलाएर सबै विवरण बताउँछौं ।

मूल मन्दिरको निर्माण सकिए पनि परिसरमा केही पूर्वाधार निर्माणको काम बाँकी रहेको जीर्णोद्वार समितिका संयोजक श्रेष्ठले बताउनुभयो । भक्तजनले सहयोग गर्ने क्रम चलिरहेकाले त्यही पैसा खर्चेर मन्दिरको पश्चिमतर्फको भागमा टेवा पर्खाल लगाउने, शौचालय निर्माण गर्ने, परेवा घर र बत्ती बाल्ने ठाउँ बनाउने लक्ष्य रहेको उहाँले बताउनुभयो । कहिले बनेको भन्ने यकिन विवरण नभए पनि मन्दिर २ सय वर्षभन्दा पहिले नै बनेको प्रमाण भेटिएको स्थानीयले बताएका छन् ।

मन्दिर परिसरमा पृथ्वीनारायण शाहले वि सं १८२५ सालमा स्थापना गर्न लगाएको घण्टौँ अहिले पनि सुरक्षित राखिएको छ । वि सं २०२६ सालमा छानो फेर्नेबाहेक मर्मतको कुनै काम हुन नसक्दा मन्दिर जीर्ण बन्दै गएको थियो ।

२०६८ साल चैत २० गते तत्कालीन प्रधानमन्त्री बाबुराम भट्टराईले मन्दिर जीर्णोद्वारको शुभारम्भ गर्नुभएको थियो । तर आर्थिक अभावलगायतका कारण जीर्णोद्धारको काम अघि बढ्न सकेको थिएन । सरकारले आवश्यक रकम उपलब्ध गराउन ढिलाई गरेपछि जीर्णोद्धार समितिले भक्तजनसँग चन्दा संकलन थालेको थियो ।

अन्तिम अपडेट: मंसिर ८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

किरण लोहनी

उज्यालोका गोरखा सम्वाददाता किरण लोहनी गोरखाको च्वाइस एफएममा पनि काम गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्