संघीय समाजवादी फोरम नेपालले माग्यो प्रहरी महानिरीक्षक खनालको राजीनामा

 मंसिर २४, २०७५ सोमबार १४:५२:२९ | उज्यालो सहकर्मी
unn.prixa.net

काठमाडौं – सत्तारुढ संघीय समाजवादी फोरम नेपालले प्रहरी महानिरीक्षक सर्वेन्द्र खनालको राजीनामा माग गरेको छ ।

संघीय समाजवादी फोरम नेपालकी सांसद प्रमिला कुमारीले निर्मला हत्याकाण्डका दोषीलाई अझै पक्राउ गर्न नसकेकोमा आपत्ति जनाउँदै प्रहरी महानिरीक्षक खनालको राजीनामा माग गर्नु भएको हो ।

सोमबार संघीय संसदको दिगो विकास तथा सुशासन समितिले देशको सुशासनको अवस्था कमजोर हुँदै गइरहेको अवस्थाबारे छलफल गर्न प्रहरी महानिरीक्षक खनाललाई बोलाएको थियो ।

समितिको सोही बैठकमा बोल्दै सांसद कुमारीले निर्मला हत्याकाण्डका दोषीलाई पक्राउ गर्ने आँट गर्न नसक्ने प्रहरी महानिरीक्षक खनाल पदमा रहिरहन नमिल्ने तर्क पनि गर्नुभयो । उहाँले निर्मला हत्याकाण्डको अनुसन्धानको नाममा निर्दोषलाई पक्राउ गरी यातना दिने काम अभिलम्ब बन्द गर्न पनि प्रहरी महानिरीक्षक खनालको गम्भीर ध्यानाकर्षण गराउनुभयो ।

सांसद कुमारीले निर्मला हत्याकाण्डका दोषीलाई अझै पक्राउ किन नगरेको भनि प्रहरी महानिरीक्षक खनाललाई पटक–पटक प्रश्न गर्नुभयो । उहाँले प्रहरी महानिरीक्षक खनालले शान्ति सुरक्षाको नेतृत्व लिन नसके अरु प्रहरी अधिकृतहरु सक्षम रहेको दाबी समेत गर्नुभयो ।

गएको साउन १० गते बलात्कारपछि हत्या गरिएकी कञ्चनपुरकी १३ वर्षीया बालिका निर्मला पन्तको हत्यारालाई सरकारले अझै पक्राउ गर्न नसकेपछि त्यसको सर्वत्र आलोचना भइरहेको छ ।

अन्तिम अपडेट: भदौ ९, २०७६

तपाईको प्रतिक्रिया