अभिनेता टाइगर श्रफ र दिशा पाटनी अभिनित फिल्म ‘बागी २’ गत वर्षको सुपरहिट फिल्म हो । अब यस वर्ष निर्माण हुने फिल्म ‘बागी ३’ का लागि भने अभिनेता टाइगर श्रफका लागि अभिनेत्री को हुनेछिन् भन्ने कुराको टुंगो लाग्न सकेको छैन । 

टाइगर श्रफको धमाकेदार एक्सन रहने यस फिल्मका लागि निर्माताहरु अगाड देखि नै अभिनेत्रीको खोजीमा रहेका छन् । सुरुमा यस फिल्मको तेस्रो पार्टमा पनि अभिनेत्री दिशा पाटनी र टाइगर श्रफकै जोडी हुने कुराको चर्चा थियो । तर पछि दिशा पटानी नभई यस फिल्मको पहिलो भागमा अभिनय गरिसकेकी अभिनेत्री श्रद्धा कपूरलाई चुनिएको भन्ने चर्चा चल्यो । पछि श्रद्धा कपूर पनि यस फिल्ममा नरहेको कुरा सार्वजनिक भयो । 

केही दिनअघि मात्रै सुपरहिट फिल्म ‘सिम्बा’ की अभिनेत्री सारा अली खान टाइगरको जोडी बन्ने बताइयो तर सारा अली खान पनि फिल्म ‘सिम्बा’ पछि फिल्म छनौटको कुरामा निकै सतर्क भइसकेकी छिन् ।

उनले अब अभिनेताको तुलनामा अभिनेत्रीको भूमिका छोटो हुने फिल्ममा काम गर्न अस्वीकार गरिदिइन् । फिल्म ‘सिम्बा’ मा अभिनेता रणवीर सिंह मुख्य भूमिका रहेको थियो भने सारा अली खानको भूमिका निकै नै छोटो थियो । फिल्म ‘बागी ३’ मा पनि टाइगर श्रफको मात्रै दमदार भूमिकामा देखाइने भएकै कारण साराले यस फिल्ममा काम गर्न मानिनन् । 

खबरहरुका अनुसार फिल्म निर्माताहरु अझै यस फिल्मकी अभिनेत्री को हुनेछिन् भन्ने कुराको निष्कर्षका पुगेका छैनन् ।