विद्यालयले खाजा दिन थालेपछि विद्यार्थी बढे

असार ९, २०७५ शनिबार ११:१०:४९ | देव पचभैया

पाल्पा – दिवा खाजाको व्यवस्था भएपछि पाल्पामा कुमाल समुदायका बालबालिकाहरू विद्यालय जान थालेका छन ।

रिब्दीकोट गाउँपालिका –१, जोगिथुममा रहेको कालिका आधारभूत विद्यालयले कक्षा सञ्चालन हुँदा नास्ता खाने व्यवस्था मिलाएपछि स्थानीय बालबालिका नियमित विद्यालय जान थालेको विद्यालयका प्रधानाध्यापक सुरेशबहादुर कुमालले जानकारी दिनुभयो ।

रिब्दीकोट गाउँपालिकासहित जिल्लाका अन्य संस्था र व्यक्तिहरुको सहयोगमा दिवा खाजाको व्यवस्था मिलाएपछि अभिभावकले पनि आफ्ना छोराछोरीलाई विद्यालय पठाउन सुरु गरेका हुन् । गएको जेठ महिना देखि विद्यालयमा दिवा खाजाको व्यवस्था गरिएको हो ।

गएको आर्थिक वर्षमा ७० देखि ८० जना मात्रै बालबालिका पढ्न आउने बिद्यालयमा दिवा खाजाको ब्यवस्था भएपछि अहिले १ सय ३० जना बिद्यार्थी नियमित विद्यालय आइरहेको प्रअ कुमालले जानकारी दिनुभयो । विद्यार्थीलाई तालिका बनाएरै दैनिक रुपमा विद्यालयले खाजा खुवाउँदै आएको छ । आइतबार चना अण्डा, सोमबार चाउमिन, मंलबार रोटी तरकारी, बुधबार हलुवा, बिहीबार पुलाउ तरकारी र शुक्रबार फलफूल नास्ताको रुपमा खुवाउने विद्यालयले जनाएको छ ।

१ सय १७ घरपरिवार रहेका जोगीथुममा एक सय १२ घर कुमाल र पाँच घरपरिवार मगर समुदायका छन् । सदरमुकाम तानसेनदेखि विकट मानिने जोगीथुमका अधिकांश स्थानीयले रिडीघाटमा गएर बालुवा चाल्ने र बजारमा मजदुरी गर्दे आएका छन् ।

जोगीथुममा रहेका कुमाल समुदायमा शैक्षिक चेतनास्तर कम भएकाले अभिभावकले पनि छोराछोरीलाई किताब कापी किनिदिनुभन्दा अन्य फजुल खर्चमा पैसा खर्च गर्ने चलन रहेको रिब्दीकोट गाउँपालिका –१, का वडा अध्यक्ष विष्णु गैरेले बताउनुभयो ।

अन्तिम अपडेट: कात्तिक २९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।