सबै सन्तान तमोर नदीले बगाएपछि...

साउन ९, २०७६ बिहीबार ९:३५:३५ | सन्ताेष रुचाल

धनकुटा – धनकुटा नगरपालिका–८ का शंखबहादुर राई तीन जना छोराछोरी तमोर नदीले बगाएपछि सन्तानविहीन बन्नुभएको छ ।

गएको आइतबार पौडी खेल्ने क्रममा शंखबहादुरको ९ वर्षका छोरा सन्दीप राई, ७ वर्षकी छोरी सलिना राई र ४ वर्षीया छोरी संजिला राईलाई तमोर नदीले बगाएको हो ।

घटना गएको आइतबार को भए पनि प्रहरीले साउन ७ गते साँझ मात्र खबर पाएको थियो । घटनाको जानकारी पाएपछि जिल्ला प्रहरी कार्यालय धनकुटाबाट प्रहरी निरीक्षक डम्बरबहादुर थापाको नेतृत्वमा बुधबार बिहान प्रहरीको टोली घटनास्थल गएको थियो ।

घटनास्थल पुगेर स्थानीयबासीन्दाको सहयोगमा दिनभर नदीले बगाएका बालबालिकाहरुको खोजी गरे पनि फेला पार्न नसकिएको जिल्ला प्रहरी कार्यालय धनकुटाका प्रहरी उपरीक्षक सुदर्शनप्रसाद कोइरालाले जानकारी दिनुभयो । घटनाको जानकारी पाए पश्चात् धनकुटासहित सुनसरी कार्यालयमा पनि जानकारी गराएर नदीले बगाएर बेपत्ता भएका बालबालिकाको खोजी कार्य जारी राखिएको प्रहरीले बताएको छ ।

याक्चना घाट नजिकै रहेको साहुको खेत अधियाँमा कमाउँदै आउनुभएका शंखबहादुरले विद्यालय बिदा भएका कारण छोराछोरीलाई पनि सँगै खेतमा लिएर जानुभएको थियो । बुबाआमा खेतमा काम गर्न थालेपछि बालबालिकाहरु गोरु चराउँदै नदीमा खेल्न गएको बेला उनीहरु तीनै जनालाई बगाएको हो ।

सबैभन्दा पहिला कान्छी छोरीलाई नदीले बगाएको थियो । उनलाई बचाउन खोज्दा जेठी छोरीलाई पनि खोलाले बगायो । दुबै जना बहिनीलाई खोलाले बगाएपछि उद्धार गर्न गएका दाजु सन्दीप पनि खोलामा बगेर बेपत्ता भएको प्रत्यक्षदर्शीलाई उद्धृत गर्दै घटनास्थल पुग्नुभएका प्रहरी निरीक्षक डम्बरबहादुर थापाले बताउनुभयो ।

भएका तीनै जना सन्तान नदीले बगाएपछि शंखबहादुर दम्पत्तीको बिचल्ली भएको छ ।

अन्तिम अपडेट: मंसिर ६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

सन्ताेष रुचाल

रुचाल धनकुटाका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्