घाइते भएर सडकमै बेवारिसे रहेका मुसाे दमाईकाे उद्धारपछि नि:शुल्क उपचार सुरु

कात्तिक १४, २०७६ बिहीबार २०:३७:२८ | नेत्र शाही

जुम्ला - अपाङ्गता भएका मुसो दमाई सडकमा बेवारिसे र रक्ताम्मे भेटिएपछि उपचारका लागि स्थानीयले उद्धार गरेका छन् । तातोपानी गाउँपालिका–१ राँका गाउँका मुसोलाई सडकमा बेवारिसे ढलिरहेको अवस्थामा उद्धार गरी कर्णाली स्वास्थ्य विज्ञान प्रतिष्ठान शिक्षण अस्पताल पुर्‍याइएको छ ।

खाने र बस्ने कुनै आधार नभएपछि सडकमा ह्वीलचेयरको सहयोगमा जीवन बिताइरहेका मुसो दमाई कर्णाली राजमार्गको लाम्राखण्डअन्तर्गत पञ्चेश्वर बहुउद्देश्यीय सहकारी नजिकै बेवारिसे र शरीरमा रगत बगिरहेको अवस्थामा भेटिएपछि स्थानीयले रकम संकलन गरी अस्पताल पुर्‍याएका हुन् ।

तातोपानी गाउँपालिका वडा नम्बर ५ र ६ का स्थानीयहरुले मुसोलाई अस्पताल पुर्‍याएका हुन् । ह्वीललचेयर लडेर नालीमा खसेपछि उहाँ ३ दिनदेखि सडकमै बास बस्न बाध्य हुनु भएको थियो । ‘तिहारको दिनमा पनि राम्रोसँग खाना खान पाइएन’, उहाँले भन्नुभयो, ‘छाक टार्नैका लागि अर्को गाउँ हिँड्दै थिएँ । एउटा गाडी माथिबाट आयोे, म तलबाट ह्वीलचेयरमा आउँदै थिए, छेउ लाग्दै थिएँ, नालीमा लडेर पुरानो घाउबाट निरन्तर रगत बग्न थाल्यो ।’

दायाँ खुट्टामा रहेको उहाँको पुरानो घाउबाट निरन्तर रगत बगेर सडक पनि रातो भएको थियो । ‘दिसापिसाब सबै शरीरमै भएको देखिएपछि सानो सानो रकम संकलन गरेका थियौँ । त्यसपछि स्थानीयप्रशासन र प्रहरीमा खबर गरेर उहाँलाई कर्णाली स्वास्थ्य विज्ञान प्रतिष्ठान पुर्‍याइएको हो’, स्थानीय नागरिक आदिप्रसादन् यौपानेले जानकारी दिनुभयो । उहाँका अनुसार चिया खान आएका बेला बेवारिसे देखेपछि सबै मिलेर नौ हजार रुपैयाँ उठाएर अप्पताल लगिएको थियो ।

स्थानीय लाम्रा प्रहरी चौकीको सहयोगमा उहाँलाई अस्पताल पुर्‍याइएको थियो । अस्पतालमा होसमा आएका मुसो दमाईले ‘खाना नखाएको धेरै भयो, भोक लागेको छ’ भनेपछि उहाँलाई सबैभन्दा पहिले प्रतिष्ठानमा खाना खुवाइएको थियो ।

प्रतिष्ठानमा निःशुल्क उपचार सुरु

कर्णाली स्वास्थ्य विज्ञान प्रतिष्ठान शिक्षण अस्पताल जुम्लाले खुट्टामा घाउ भएका मुसोको निःशुल्क उपचार गर्ने भएको छ । प्रतिष्ठानका रजिष्ट्रार विश्वराज काफ्लेले उहाँको उपचार निःशुल्क हुने बताउनुभयो । विपन्न नागरिकको उपचारको घर प्रतिष्ठान भएकाले प्रतिष्ठानले उहाँलाई निःशुल्क उपचार गर्ने उहाँको भनाइ छ ।

उहाँकोे उपचारमा प्रतिष्ठानका विशेषज्ञ डाक्टर मंगल रावलसहितको चिकित्सकको टोली खटिएको छ । डा. रावलले एक महिना प्रतिष्ठानले उपचार गर्नका लागि उहाँलाई प्रतिष्ठानको विशेष कक्षमा राख्ने बताउनुभयो ।

‘तिहारको अघिल्लो दिनबाट तिघ्राबाट रगत बगेर सडकमै थिएँ । अस्पताल आउन खोज्दा कुनै गाडीले पनि ल्याउन मानेनन् र खान पनि पाइनँ’ मुसो दमाईले भन्नुभयो । उहाँले आफ्नो कोही आफन्त नभएको पनि बताउनुभयो । आफू घाइते भएर काम गर्न नसक्ने भएपछि श्रीमतीले पनि छोडेर गएको उहाँले बताउनुभयो ।

अन्तिम अपडेट: मंसिर ८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

नेत्र शाही

जुम्लामा बसेर पत्रकारिता गर्ने नेत्र शाही उज्यालोका जिल्ला सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्