नेपाल र कुवेतबीचकाे खेल फ्लड लाइटमा हुने, अनलाइनबाट टिकट काट्ने व्यवस्था

कात्तिक १५, २०७६ शुक्रबार १८:४३:५८ | उज्यालो सहकर्मी

काठमाण्डाै - विश्वकप छनोट प्रतियोगिताका लागि अहिले दशरथ रंगशालाको फिनिसिङ भइरहेको छ । पहिलो होम म्याच सफल बनाउनका लागि कामदारसँगै सम्बन्धित पदाधिकारी पनि दिनरात खटिरहेका छन् ।

खेल मंसिर ३ गते ५ः४५ बजे फ्लड लाइटमा सञ्चालन हुनेछ । दशरथ रंगशालालाई अन्तर्राष्ट्रिय मापदण्डको मैदान बनाउने कार्य जोडतोडका साथ चलिरहेको छ ।

खेलप्रेमीले साढे ५ वर्षपछि पहिलो पटक होम म्याच हेर्नका लागि टिकट अनलाइनमार्फत बुकिङ गर्न सक्नेछन् । ‘टिकटको मूल्य र अनलाइन पार्टनरको घोषणा हामी दुई–तीन दिनभित्रमा गर्नेछौँ', अखिल नेपाल फुटबल संघका अध्यक्ष कर्मा छिरिङ शेर्पाले भने ।

अहिले मैदानमा दुबो गोडमेल गर्ने काम भइरहेको छ । त्यससँगै दर्शक बस्ने प्यारापिटमा सिट राख्ने काम पनि भइरहेको छ । अखिल नेपाल फुटबल संघले भीआईपी प्यारापिट तलको कोठामा सचिवालय समेत सारिसकेको छ । र पदाधिकारी निरन्तर निरीक्षणमा छन् । रंगशालामा फ्लड लाइट, स्कोरबोर्ड, सेन्थेटिक ट्र्याकका काम सकिएका छन् भने चेञ्जिङ र रुमका शौचालयको फिनिसिङ् मात्र बाँकी छ ।

दुई हप्ताभित्र यी कामहरु सकाउनु पर्नेछ । एन्फाले यो खेललाई नेपाली फुटबलको कोशेढुंगाका रुपमा लिएको छ । एन्फा अध्यक्ष शेर्पा भन्छन्,‘नेपाली दर्शकले स्तरीय रंगशालामा फुटबल हेर्न नपाएको धेरै भइसक्यो । यो म्याचका लागि सबै नेपाली फुटबलप्रेमीहरु उत्साहित छन् ।’ ‘मिडिया, सामाजिक सञ्जालहरुमा पनि प्रतिक्रिया देख्दा यो खेलले नेपाली फुटबलको विकासमा नयाँ उचाइ थप्नेछ’, अध्यक्ष शेर्पाले थपे ।

‘स्टेडियम नभएको कारणले हामी धेरै प्रतियोगिता आयोजनाबाट बञ्चित भएका थियौँ । विश्वकप छनोटमा पनि सुरुमा होम म्याच खेल्न पाएको भए नतिजा अर्कै हुन सक्थ्यो ।’ ‘यो रंगशाला नहुँदा मरेको जस्तो नेपाली फुटबल धेरै राम्रो हुनेछ’, अध्यक्ष शेर्पाले भने । अरु सबै पक्षका कामहरु सम्पन्न हुने भए पनि कुवेतविरुद्धको होम म्याचसम्म भीआईपी प्यारापिट नसकिने भने पक्का छ ।

कुवेतसँगको म्याच हेर्ने भीआईपीहरुलाई साधारण प्यारापिट तर्फकै दक्षिणतर्फको भागमा बसाइने छ । खेलअघि फिफाका प्रतिनिधि मैदान निरीक्षणका लागि आउनेछन् । उनीहरुले मैदानको अवस्था र खेलाडीको सुरक्षाको ग्यारेन्टी पाएपछि अनुमति दिएपछि नेपाली समर्थकले साढे पाँच वर्षपछि दशरथ रंगशालामा अन्तर्राष्ट्रिय म्याच हेर्न पाउनेछन् ।

सम्बन्धित समाचार

दशरथ रंगशालामा सिट जडानको काम सुरु (तस्बिरसहित )

अन्तिम अपडेट: मंसिर १०, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्