माथिल्लो तामाकोशीको निर्माण कार्य ९९.३ प्रतिशत सम्पन्न

आउँदो असारबाट विद्युत उत्पादन गरिने

पुष २३, २०७६ बुधबार १४:४३:३६ | उषा तामाङ

दोलखा – स्वदेशी लगानीमा निर्माण भइरहेको माथिल्लो तामाकोशी जलविद्युत आयोजनाले आउँदो असारबाट विद्युत उत्पादन गर्न सुरु गर्ने भएको छ । राष्ट्रिय गौरवको आयोजना अर्न्तगतको यस जलविद्युत आयोजनाको निर्माण कार्य ९९.३ प्रतिशत सम्पन्न भइसकेको छ ।

आयोजनाको कुल ६ युनिटमध्ये एउटा युनिटबाट ७६ मेगावाट बिजुली असार महिनाभित्र राष्ट्रिय प्रसारण लाइनमा जोडिने आयोजनाका प्रवक्ता डाक्टर गणेश न्यौपानेले जानकारी दिनुभएको हो ।

हाल, आयोजनाको निर्माण कार्य विभिन्न ४ ‘लट’मा भइरहेको छ । जसमध्ये सन् २०१८ को डिसेम्बर महिनामा निर्माण कार्य सकिएको ‘लट’ नम्बर ३ को इलेक्ट्रोमेकानिकल कार्य समेत शत प्रतिशत सम्पन्न भइसकेको छ ।

त्यसैगरी ‘लट’ नम्बर १ को सिभिल कार्य (भाैतिक संरचनागत कामहरु) ९९.५ प्रतिशत काम सकिएको छ । ‘लट’ नम्बर ४ को प्रसारण लाइनको काम शत प्रतिशत र सबस्टेशन निर्माणको कार्य ८० प्रतिशत सम्पन्न भएको छ ।

जनवरी महिनाको अन्तिम सम्ममा ४ नम्बर ‘लट’को काम सम्पन्न गरी अप्रिल महिनाभित्र उपकरण जडान गरिसक्ने लक्ष्य रहेको छ ।

यस्तै, ‘लट’ नम्बर २ को पेनस्टक पाइप आपूर्ति तथा जडानको ठेक्का पाएको भारतीय कम्पनी टेक्स म्याकोको ढिलासुस्तीको कारण अपेक्षाकृत प्रगति हुन सकेको छैन् । कार्य सम्पादनमा भएको ढिलासुस्तीका कारण विद्युत उत्पादनमा प्रत्यक्ष प्रभाव परेको आयोजनाका प्रवक्ता डा.न्यौपानेले जानकारी दिनुभयो ।

त्यस कम्पनीको कमजोर कार्यसम्पादनपछि तल्लो ठाडो सुरुङमा पाइप जडानको जिम्मा इलेक्ट्रोमेकानिकल (‘लट’ ३) को ठेकदार अष्ट्रियन कम्पनी एन्ड्रिज हाइड्रोलाई दिइएको थियो ।

अपर तामाकोसी हाइड्रोपावर लिमिटेड, टेक्सम्याको र एन्ड्रिजबीच गएकाे २३ पुसमा आयोजनालाई वित्तीय भार नपर्ने गरी निर्माण कार्य सम्पन्न गर्ने त्रिपक्षीय सम्झौता भएको थियो । माथिल्लो सुरुङमा पाइप जडान भने टेक्स म्याकोले नै गरिरहेको छ ।

भारतीय कम्पनी टेक्स म्याकोलाई आयोजनाकाे जिम्मा पूरा गर्न निरन्तर ताकेता भइरहेको आयोजनाले जनाएको छ । एउटा युनिटबाट बिजुली उत्पादन भएको ३ महिनाभित्र बाँकी रहेका ५ वटै युनिटबाट बिजुली उत्पादन हुनेछ ।

२०६७ साल भदौ ७ गतेबाट आयोजनाको मुख्य सिभिल कार्य सुरु भएको थियो । आयोजनाको काम सम्पन्न गर्न झण्डै ७० अर्ब लागत लाग्ने अनुमान गरिएको छ ।

अन्तिम अपडेट: मंसिर ८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

उषा तामाङ

उज्यालोका दोलखा सहकर्मी उषा तामाङ कालीञ्चोक एफएममा पनि कार्यरत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्