लकडाउनका कारण काठमाण्डौमा अलपत्र परेका १ सय ४ जनालाई धनकुटा नगरपालिकाद्वारा उद्धार

 बैशाख १६, २०७७ मंगलबार २०:२३:४३ | सन्ताेष रुचाल
unn.prixa.net

धनकुटा - लकडाउनका कारण काठमाण्डौमा अलपत्र परेका १ सय ४ जना धनकुटाका नागरिकलाई उद्धार गरेर जिल्ला ल्याइएको छ ।

धनकुटा नगर क्षेत्रका उनीहरुलाई दुई वटा बसमा राखेर जिल्ला ल्याइएको हो । सोमबार बेलुका काठमाण्डौबाट छुटेको बसले मंगलबार अपराह्न ४ बजे जिल्ला सदरमुकाम धनकुटा उनीहरुलाई ल्याइपुर्याएको हो । 

पालिकाहरुसँगको समन्वयमा उनीहरुलाई उद्धार गरेर घर फर्काइएको हो । काठमाडौमा विभिन्न पेशा, अध्ययन तथा उपचारको क्रममा रहेर लकडाउनका कारण अलपत्र परेका उनीहरुलाई नगरपालिकाले उद्धार गरेर धनकुटा ल्याएको धनकुटा नगरपालिकाका मेयर चिन्तन तामाङले जानकारी दिनुभयो । 

उनीहरुलाई धनकुटासम्म आउँदा लागेको गाडी भाडा बापतको रकम नगरपालिकाले बेहोरेको छ । गाडीले प्रतिव्यक्ति १५ सयका दरले धनकुटासम्म ल्याएको थियो । जिल्ला भित्रिएका सबैलाई भेडेटारमा स्वास्थ्य परीक्षण गरिएको छ । 

उनीहरुलाई अनिवार्य होम क्वारेण्टीनमा राखिने गरी ल्याइएको हो । होम क्वारेण्टीनमा रहेको बेला स्थानीय प्रशासन, सम्बन्धित वडा कार्यालयहरुले निगरानी गर्नेछन् । 

अन्तिम अपडेट: असार ११, २०७७

सन्ताेष रुचाल

रुचाल धनकुटाका उज्यालो सहकर्मी हुनुहुन्छ । 

तपाईको प्रतिक्रिया