सङ्खुवासभा : पहिरोमा फसेकाकाे उद्धार गर्ने क्रममा एक जनाको ज्यान गयाे

असार २८, २०७७ आइतबार १५:५२:२० | नवीन गुरुङ

सङ्खुवासभा – सङ्खुवासभाको सिलिचोङ गाउँपालिका १ काे बेसिन्दा गाउँमा शनिबारदेखि परेको अविरल वर्षापछि गएको पहिरोमा परेकाहरुको उद्धार गर्ने क्रममा एक जनाको ज्यान गएकाे छ ।

पहिरोमा बेपत्ता भएकाकाे खाेजी र उद्धार गर्ने क्रममा दमका रोगीसमेत रहेका स्थानीय मदन राईको हृदयघातकाे कारण ज्यान गएकाे हो ।

जिल्ला प्रहरी कार्यालय सङ्खुवासभाका प्रहरी नायब उपरीक्षक (डीएसपी) नवराज मल्लले घटनाबारे जानकारी दिनुभएको हो । बेपत्ता हुनेहरुमा राममान कुलुङ, हस्तकुुमारी कुलुङ, नम्रता कुलुङ, एन्जिला कुलुङ (गर्भवती), नम्रता कुुलुङ, बिनिला कुलुङ, गोरीमाया कुलुङ, उत्तरकुमारी कुलुङ, जुद्धबहादुर (माने) कुलुङ, धनशंकर (मलमराइ), आइतजिन (मारिम) कुलुङ र नजमाया कुलुङ रहेकाे डीएसपी मल्लले बताउनुभयो ।

उहाँका अनुसार स्थानीयको पहलमा गेदासिंह कुलुङ, भीमसरी राई, फुलमायाँ राई र भीमबहादुर कुलुङ गरी चार जनाको उद्धार गरिएकाे छ । पहिरोमा परेर सिलिचोङ गाउँपालिका १ बेसिन्दा गाउँका गेदासिंह कुलुङ, जुद्धबहादुर कुलुङको तीन जनाको परिवार, सन्दीप कुलुङको दुई जनाको परिवार, रामधन कुलुङ र भीमबहादुर कुलुङकाे घर बगाएको जिल्ला प्रशासन कार्यालय सङ्खुवासभाका सहायक प्रमुख जिल्ला अधिकारी मोहनमणि घिमिरेले बताउनुभयो ।

पहिराेका कारण चेप्चेवा स्वास्थ्य चौकी भवनमा क्षति पुगेको छ भने चटेक्मा हाइड्रोपावर हाउसमा समेत क्षति पुगेको जनाएको छ । उद्धारकाे लागि ताम्कु र सिसुवाटारमा रहेको प्रहरी चौकीबाट नेपाल प्रहरी र ताम्कुमा रहेको नेपाली सेनाको टोली घटनास्थलतर्फ गइसकेकाे छ । थप जनशक्तिकाे लागि सदरमुकाम खाँदबारीबाट नेपाल प्रहरी १५, सशस्त्र प्रहरी बल १५ र नेपाली सेनाका ३० जना गरी ६० जनाको टोली पनि गइसकेकाे जिल्ला प्रशासन कार्यालय सङ्खुवासभाले जनाएको छ ।

सिलिचोङ गाउँपालिकाको सिकदिममा एक दशकअघि गएको पहिरोले तीन जनाको ज्यान गएकाे थियाे भने ११ जना बेपत्ता भएका थिए ।

पानी नरोकिँदा खोजी कार्यमा समस्या

शनिबार रातिदेखि परेको अविरल वर्षा अझैसम्म रोकिएको छैन । निरन्तर वर्षाको कारण खोजी, उद्धार कार्य र आवात जावतमा समस्या भएको प्रहरीले जनाएको छ ।

अरुणपारिको गाउँपालिका भनेर चिनिने सिलिचोङ गाउँपालिका दुर्गम ठाउँमा रहेको छ । पानी पर्ने क्रम नरोकिएकाे, बीच बाटोमा स-साना पहिरो झरेकोले उद्धारकाे लागि गएको टोलीलाई सिलिचोङतर्फ जान पुग्न समस्या भएको सङ्खुवासभाका सहायक प्रजिअ घिमिरेले बताउनुभयो ।

विभिन्न ठाउँमा पहिरोले क्षति

अविरल वर्षाकाे कारण सङ्खुवासभाकाे विभिन्न ठाउँ पहिरोले क्षति पुर्‍याएकाे छ । खाँदबारी नगरपालिका १ काे देवकोटा चौकदेखि सातकुवा जाने सडकमा दुई सय मिटरभन्दा माथिबाट पहिरो झरेकाले सडक अवरुद्ध भएको छ । पहिराे खस्दा केही घर जोखिममा परेका छन् भने केही सुरक्षित स्थानतर्फ गएका छन् ।

खाँदबारी १ ढोलबाजेको सडकमाथिबाट पहिरो झरेकाेले आवात जावातमा समस्या भएको छ । विभिन्न ठाउँमा गएको पहिरो र क्षतिको विवरण सङ्कलन गर्ने काम भइरहेको जिल्ला प्रहरी कार्यालय सङ्खुवासभाले जनाएको छ ।

अन्तिम अपडेट: कात्तिक २८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

नवीन गुरुङ

संखुवासभाका पत्रकार नवीन गुरुङ उज्यालोका जिल्ला सम्बाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्