नेपाल–भारत हवाई उडानको तयारी, भारतले पठाएको प्रस्ताव मन्त्रिपरिषदमा दर्ता हुँदै

असोज १४, २०७७ बुधबार १५:९:४० | अर्जुन पोख्रेल

काठमाण्डाै – कोरोना भाइरसको महामारी कारण बन्द भएको नेपाल–भारत हवाई उडान फेरि सुरु गर्ने तयारी भएको छ । भारतले नियमित उडान सुरु गरिसकेको छैन । तर पनि दुई देशका नागरिक र अन्य निश्चित निकायका व्यक्ति मात्रै बोक्न पाउने गरी दुई देशबीच उडान सुरु गर्न भारतले नेपाललाई प्रस्ताव पठाएको थियो ।

भारतको प्रस्तावअनुसार दुई देशका एअरलाइन्सले पहिलेको भन्दा निकै थोरै सङ्ख्यामा उडान गर्ने र उडानमा नेपाल र भारतका नागरिक, कुटनीतिक नियोग, संयुक्त राष्ट्र सङ्घका प्रतिनिधि तथा विकास साझेदार नियोगका कर्मचारीले मात्रै उडान गर्न पाउनेछन् । यसलाई हवाई उड्डयनको भाषामा ‘एअर बबल ट्राभल’ भनिन्छ ।

‘लामो समयदेखि उडान नहुँदा नेपाल र भारतका नागरिकले अत्यावश्यक कामको लागि पनि एक अर्को देशमा जान नसकेको अवस्थालाई ध्यान दिएर उडान सुरु गर्न लागिएको हो, उडानमा दुई देशका नागरिक र कुटनीतिक नियोग तथा विकास नियोगमा कार्यरत तेस्रो देशका नागरिक र उनीहरुका परिवार मात्रै रहनेछन्’, संस्कृति, पर्यटन तथा नागरिक उड्डयन मन्त्रालयका सहसचिव सुरेश आचार्यले उज्यालो अनलाइनसँग भन्नुभयो ।

भारतले पठाएको ‘एअर बबल ट्राभल’ को प्रस्तावमा मन्त्रालयमा छलफल भइसकेको र यो प्रस्ताव सम्भवतः आजै मन्त्रिपरिषदमा दर्ता हुने सम्भावना रहेको मन्त्रालयले जनाएको छ । मन्त्रिपरिषद्ले पारित गरेपछि नेपाल–भारत बीच हुने उडानको जहाज र उडान सङ्ख्याको टुङ्गो लाग्नेछ ।

मन्त्रिपरिषद्को निर्णय आउनासाथ उडान हुन्छ : महानिर्देशक पोख्रेल

नेपाल नागरिक उड्डयन प्राधिकरणका महानिर्देशक राजन पोख्रेलले भारतले उडानको लागि प्रस्ताव पठाएको जानकारी दिँदै छिट्टै उडान सुरु हुन सक्ने बताउनुभयो ।

‘भारतले अझै पनि नियमित उडान सुरु गरेको छैन, यस्तो अवस्थामा एअर बबल ट्राभलमार्फत उडान हुनेछ, मन्त्रिपरिषद्ले निर्णय गरेर पठाउनासाथ हामी उडानका तयारी थाल्छौँ’, महानिर्देशक पोख्रेलले उज्यालो अनलाइनसँग भन्नुभयो ।

अन्तिम अपडेट: पुस ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

अर्जुन पोख्रेल

उज्यालोमा कार्यरत अर्जुन पोख्रेल आर्थिक विषयमा कलम चलाउनु हुन्छ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्