जुम्ला – जुम्लाका स्याउ किसानलाई सरकारले ५० प्रतिशत अनुदानमा स्याउका कार्टुन उपलब्ध गराएको छ । नेपाल सरकार प्रधानमन्त्री कृषि आधुनिकीकरण कार्यक्रम अन्तरगत स्याउ किसानलाई ५० प्रतिशत अनुदानमा कार्टुन उपलब्ध गराइएको स्याउ सुपरजोन कार्यालयका प्रमुख नवराज भण्डारीले जानकारी दिनुभयो । 

उहाँका अनुसार गएको भदौ १ गते १८ हजार कार्टुन भित्र्याइएकोमा स्याउ किसानलाई १५ हजार कार्टुन वितरण गरिएको हो । सरकारको सानो सहयोगले किसानलाई स्याउ सुरक्षित राख्न र निर्यात गर्न सजिलो हुने भएकाले यस वर्ष अनुदानका कार्टुनको कार्यक्रम राखिएको उहाँले जोड दिनुभयो । 

अनुदानका स्याउ कार्टुन वितरणको जिम्मा पाएको सोपान प्रेस पाइभेट लिमिटेडका सदस्य राजबहादुर भक्रीले एक सय १० रुपैयाँको कार्टुन ५५ रुपैयाँमा किसानलाई उपलब्ध गराइएको छ । किसानहरुले ५० देखि एक हजारसम्म कार्टुन लिएको भक्रीले जानकारी दिनुभयो । उहाँका अनुसार तीन हजार कार्टुन बिक्री गर्न बाँकी छ ।  

किसानलाई अनुदानमा कार्टुन दिएपछि स्याउ निर्यातमा सजिलो भएको गुठीचौर ४ खल्लाबाडाका किसान देवीराम नेपालीले बताउनुभयो । 

जुम्लामा यस वर्ष आएको कार्टुनमा १० देखि १२ केजीसम्म अट्ने र सजिलो भएको किसानहरुले बताएका छन् । यस वर्ष जुम्लामा स्याउ ५० प्रतिशत कम फलेकाले खासै कार्टुनको अभाव नभएको किसानहरुले बताएका छन् ।