महाेत्तरी : दिवा खाजाबापतको रकम प्रधानाध्यापकले व्यक्तिगत रूपमा खर्चिएकाे पाइयाे

माघ १३, २०७७ मंगलबार १९:४६:५३ | धनवीर महतो

महोत्तरी – गाैशाला नगरपालिका ११ मा रहेकाे नेपाल राष्ट्रिय जनता आधारभूत विद्यालय कालिपुरका प्रधानाध्यापक देवनारायण महतोले दिवा खाजाबापतको रकम व्यक्तिगत काममा खर्चिएको पाइएको छ ।

विद्यालयमा मङ्गलबार बसेको अभिभावकहरूको भेलामा यस्ताे खुलासा भएको हो । दिवा खाजाका लागि नगरपालिकाले उपलब्ध गराएको एक लाख ७६ हजार चार सय रुपैयाँमध्ये विद्यालयका प्रधानाध्यापक महतोले ८७ हजार रुपैयाँ व्यक्तिगत रूपमा खर्च गरेको पाइएको हो ।

प्रधानाध्यापक महतोले त्याे रकम समितिलाई जानकारी नदिइकन व्यक्तिगत रूपमा खर्चिएको विद्यालय व्यवस्थापन समितिका अध्यक्ष दीपेन्द्रकुमार महतोले जानकारी दिनुभयो । विद्यालयमा हुँदै आएको आर्थिक कारोबारका सम्बन्धमा प्रधानाध्यापक महताेले कुनै सल्लाह नलिएको अध्यक्ष महतोले गुनासो गर्नुभयो । गएकाे वर्षको दिवा खाजाबापतको बाँकी रहेको ४४ हजार रुपैयाँलगायतका आर्थिक कारोबारको सम्बन्धमा आफूले बारम्बार रकम पारदर्शिताका लागि तकेदा गर्दासमेत प्रअले कुनै सुनुवाइ नगरिकन मनोमानी ढङ्गले विद्यालयमा आर्थिक कारोबार गरेको अध्यक्ष महतोले बताउनुभयाे ।

प्रधानाध्यापक महताेले दिवा खाजाबापत प्राप्त भएको रकममध्ये तीन जना शिक्षकलाई चार महिनाको तलब खुवाएको र बाँकी रहेकाे रकम आफू बिरामी हुँदा उपचारको लागि खाताबाट रकम निकालिएको प्रधानाध्यापक महतोले बताउनुभयो ।

पैसा फिर्ता गर्ने र आर्थिक पारदर्शिता गर्ने सहमति

सोमबार विद्यालयको खाताबाट पैसा निकालेको खबर पाएपछि विद्यालय व्यवस्थापन समिति र अभिभावकहरूले विद्यालयमा तालाबन्दी गरि रकम पारदर्शिताको माग गरेका थिए। मङ्गलबार शिक्षा शाखाका पुरुषोतम अधिकारीको उपस्थितिमा भएका अभिभावक र प्रधानाध्यापकबीच लिखित रूपमा सहमति भएपछि विद्यालय सञ्चालन गर्ने निर्णय गरिएको हो ।

प्रधानाध्यापक देवनारायण महतोले अबको एक हप्ताभित्र सबै रकम चुक्ता गर्ने लिखित प्रतिबद्धता जनाउनुभएकाे छ । त्यस्तै महताेले यसै माघ मसान्तभित्र हिसाब–किताब पारदर्शी बनाउने लिखित रूपमा प्रतिबद्धता जनाउनुभयाे ।

श्रीमान्–श्रीमती नै खाताधारी

नेपाल बैंक लिमिटेड गौशाला शाखामा विद्यालयको नाममा रहेको खातामा प्रधानाध्यापक दम्पती नै खाताधारी रहेका छन् । विद्यालयमा नाै जना शिक्षक कार्यरत रहे पनि विद्यालयको खातामा प्रधानाध्यापक देवनारायण महतो र उहाँकी श्रीमती रामदुलारी महतोको नाम छ ।

दुवै जनाको नाममा खाता रहेको र पैसा निकाल्नका लागि पनि दुवै जनाको सही चलेपछि मनोमानी ढङ्गले रकम निकालिएकाे बताइएकाे छ ।

अन्तिम अपडेट: कात्तिक ३०, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

धनवीर महतो

धनवीर महतो महोत्तरीकाे उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्