उद्यमशीलता विकासका लागि ‘आफन्त’

फागुन २१, २०७७ शुक्रबार १६:५२:३० | उज्यालो सहकर्मी

काठमाण्डौ – उद्यमशीलता विकासका लागि ‘आफन्त’ नामक सामाजिक सञ्जाल सञ्चालनमा आएको छ । नेपाल घरेलु तथा साना उद्योग महासङ्घले लघु, घरेलु तथा साना उद्योग व्यवसाय र पेसा प्रवर्द्धन गर्ने उद्देश्यले केही दिनअघि मात्रै ‘आफन्त’ नामक सामाजिक सञ्जाल सञ्चालनमा ल्याएको हो ।

नेपालीले नेपालीकै लागि बनाएर सञ्चालनमा ल्याइएको ‘आफन्त’ लाई उत्पादनदेखि बजारीकरणका लागि साना उद्योगी तथा व्यवसायीहरूले उपयोग गर्न सक्नेछन् । उत्पादन, बजार, उद्यमीलाई जोड्न सकियोस् र प्रयोगकर्तालाई सजिलो होस् भनेर एप सञ्चालनमा ल्याइएको नेपाल घरेलु तथा साना उद्योग महासङ्घका अध्यक्ष तथा आफन्त नेपाल प्रालीका अध्यक्ष श्यामप्रसाद गिरीले बताउनुभयो ।

अध्यक्ष गिरीले भन्नुभयो, ‘वेबसाइट तथा एप दुवै माध्यममा उपलब्ध आफन्त सञ्जाल गाउँघरमा उत्पादित सामग्री, साना तथा लघु उद्यमीका उत्पादनलाई बजारीकरण गर्न सहज हुनेछ । कृषि, औद्योगिकलगायत अन्य स्थानीय उत्पादक र थोक तथा खुद्रा व्यापारी र उपभोक्ताबीच वस्तु खरिद–बिक्रीबारे जानकारी लिने–दिने माध्यमका रूपमा यो एप र सञ्जाललाई विकास गरेका छौँ । निर्यातमूलक वस्तु उत्पादनकर्ता र बाह्य खरिदकर्ता र व्यापारीबीच जानकारी आदानप्रदान गर्ने माध्यमको रूपमा आफन्तलाई अगाडि बढाएका छौँ ।’

अन्य सामाजिक सञ्जालमा जस्तै ‘आफन्त’ मा तस्बिर, भिडिओ पोस्ट गर्न तथा लेख, ब्लग पनि पोस्ट गर्न, च्याट गर्न मिल्नेछ । अन्य सामाजिक सञ्जालभन्दा ‘आफन्त’ मार्फत उद्योगी व्यवसायीले संसारभर छरिएका ग्राहकलाई कुनै पनि उत्पादन बिक्री गर्न सक्ने छन् ।

रोजगारी दिने र कामको खोजीमा रहेकालाई पनि सहयोग पुर्‍याउने ‘आफन्त’ प्लेटफर्ममा आफ्नो कम्पनीलाई चाहिएको जनशक्तिबारे विस्तृत विवरण राख्न सकिनेछ । आफन्तमा सबै नेपालीलाई जोडेर व्यापार गराउने उद्देश्य रहेको भन्दै उहाँले यसलाई अझै परिष्कृत गर्दै लैजाने गिरीको भनाइ छ ।

अन्तिम अपडेट: पुस १, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्