टी-२० विश्वकप खेल्ने नेपाली टोली घोषणा
बैशाख १९, २०८१ बुधबार
विवाहपछि अधिकांशको सन्तान जन्माउने चाहना हुन्छ तर सबै दम्पतीका लागि सन्तानको जन्म सामान्य हुँदैन । निकै प्रयासका बाबजुद पनि केही दम्पतीले सन्तानको सुख पाउन सकिरहेका हुँदैनन् । अहिले नेपालमा पनि निःसन्तानपन ठूलै समस्याका रूपमा छ । यो समस्या बर्सेनि बढ्दै गएकाे देखिन्छ । सामान्यतयाः कुनै पनि दम्पतीले प्राकृतिक रूपमा एक वर्षसम्म सन्तानको प्रयास गर्दा गर्दै पनि नभए त्यसलाई निःसन्तानपन भनिन्छ ।
उमेर जति बढ्दै गयो समस्या पनि बढ्दै जान्छ । कसैको ३८/४० वर्षमा विवाह भएको छ भने, प्राकृतिक र"पमा होस् भनेर एक वर्षसम्म कुरेको राम्रो हुँदैन । यद्यपि अन्य उमेर समूहका लागि प्रयास गरेको एक वर्षसम्म पनि सन्तान नभए चिकित्सकसँग परामर्श लिनुपर्छ । प्राकृतिक रूपमा गर्भवती हुन यी कुरा सामान्य हुन आवश्यक छ ।
पहिलाे, श्रीमानको वीर्य र दोस्रो, श्रीमतीको पाठेघर स्वस्थ हुनुपर्छ । तेस्रो, महिलाको अन्डा उत्पादन गर्ने शक्ति राम्रो हुनुपर्छ र चौथो, ट्युब खुलेको हुनुपर्छ । हामीले यी चार कुरालाई आधार मानेर हेरेपछि मात्र समस्या के हो भनेर पत्ता लगाउन सक्छौँ । महिलामा मधुमेह, थाइराइड, रक्तचाप, महिनावारी गडबडी छ कि भनेर हेर्छाैँ । पहिले सन्तान खेर गएको छ या सेतोपानी बग्ने समस्या छ कि भनेर पनि हेर्नुपर्छ ।
पुरुषमा पनि यौन समस्या भए/नभएको, यौनाङ्गमा चोटपटक लागेको, लागुपदार्थको प्रयोग गर्ने/नगर्ने लगायतका कुरा हेर्न आवश्यक छ । विश्वभर निःसन्तानपनको समस्या ८ देखि १२ प्रतिशतमा देखिएको छ भने नेपालमा १५ देखि १८ प्रतिशत रहेको विभिन्न अध्ययनले देखाउँछ । निःसन्तानपनको समस्या हुनुमा महिला र पुरुष दुवै कारण हुन् ।
वैदेशिक रोजगारीमा जाने पुरुषमा निःसन्तानपनको समस्या बढी भेटिन्छ । पुरुषमा हुने निःसन्तानपनको समस्याका कारणमा विशेषगरी वीर्यको कमी, उमेर, वंशानुगतया अन्य कुनै रोग हुन सक्छ । महिलामा भने ट्युब ब्लक हुँदा, अन्डा बनाउने शक्ति एकदम कम या धेरै हुँदा अन्डा उत्पादनमा समस्या हुन्छ । पाठेघरमा ट्युमर भए या सङ्क्रमण भए, वंशानुगतकारण, हर्मोनको गडबडी, पटक–पटकको गर्भपतन र पाठेघरमा घाउ हुँदा पनि निःसन्तानपनको समस्या देखिन सक्छ । तर अहिले धेरैमा देखिने आम कारण भनेको महिलामा ट्युब ब्लक, अन्डा उत्पादनमा समस्या, पुरुषमा वीर्यको कमी र ढिलो विवाह नै देखिन्छ ।
समयमै निदान नभए समस्याअनुसार उपचार पनि हुन्छ । विशेषगरी दुई तरिकाले यसकाे उपचार हुन्छ । पहिलोमा आईयूआई र दोस्रोमा आईभीएफ अर्थात् टेस्टट्युब बेबी । आईयूआई उपचारमा श्रीमानको वीर्य या डोनर स्पर्म महिलाको पाठेघरमा प्रोसेस गरेर हाल्ने प्रक्रियालाई इन्ट्रायुटाइन इन्सेमिनेसन अर्थात् आईयूआई भनिन्छ । डोनर स्पर्म श्रीमानको वीर्य नभएको अवस्थामा दम्पतीको अनुमतिअनुसार मात्र राखिन्छ ।
आईभीएफ प्रक्रिया कृत्रिम तरिकाबाट हुन्छ । अन्डा बनाउने, अन्डा झिक्ने, श्रीमानको वीर्य या डोनरको स्पर्म मिलाएर गर्भाधान गर्नेदेखि लिएर श्रीमतीको पाठेघरमा हाल्ने सबै प्रक्रिया कृत्रिम तरिकाबाट हुन्छ । त्यसैले यसलाई टेस्टट्युब बेबी भनिएको हो । प्रजनन क्षमता हुने उमेरमै सन्तानको योजना बनाउनु राम्रो हुन्छ । ३५ वर्षपछि महिलाको अन्डा बनाउने शक्ति घट्दै जान्छ ।
आमाको पेटबाटै महिला सीमित अन्डा लिएर जन्मेका हुन्छन् । जीवनभर महिलाले नयाँ अन्डा बनाउँदैनन् । हरेक पटक महिनावारी हुँदा ती अन्डा खेर जान्छन् । ४५ वर्षपछि कृत्रिम तरिकाबाट सन्तान जन्माउन पनि गाह्रो नै हुन्छ । हुन त आईभीएफ ४५/५० उमेरसम्म पनि गर्न मिल्छ तर छिटो योजना बनाए राम्रो हुन्छ । अहिले प्रजनन क्षमता घट्दै गएको छ ।
अस्वस्थकर खानपान तथा जीवनशैली, विभिन्न किटनाशक औषधिको प्रयोग, वातावरण प्रदूषणलगायतले पनि महिला र पुरुष दुवैमा प्रजनन क्षमता घट्दै गएको पाइन्छ । ३० वर्षको उमेरका महिलामा अन्डा बनाउने शक्ति १० वर्षपछि ४० वर्षकी महिलामा तुलना गर्याैँ भने कम पाउँछौँ । त्यसैले २५ देखि ३५ वर्षभित्र सन्तान जन्माएको राम्रो हुन्छ ।
निःसन्तानपनको समस्या आउन नदिन सही उमेरमा दम्पतीले सन्तानको योजना बनाउनुपर्छ । अध्ययन र करिअर भनेर यसलाई धेरै पर सार्नु हुँदैन । स्वस्थकर खानपान र जीवनशैली अपनाउनुपर्छ । करिअर तथा अध्ययनको योजना बनाए जस्तै सन्तान जन्माउने पनि योजना बनाउनुपर्छ ।
प्राकृतिकरूपमा सन्तानको प्रयास गर्दा पनि नभए अनिवार्यरूपमा चिकित्सकको परामर्श लिनुपर्छ । समस्या हुँदाहुँदै अस्पताल ढिलो गएर उपचार गरे पनि सफल हुने सम्भावना निकै कम हुन्छ । एक जोडीले नियमित असुरक्षित यौनसम्पर्क गरेपछि गर्भधारण गर्न सकेनन् भने त्यसलाई बाझाेपन भनिन्छ । बाझोपन समस्या महिला, पुरुष वा दुवै जनामा हुन सक्छ ।
बाझोपन दुई प्रकारको हुन्छ
१. Primary infertility (प्राथमिक बाझाेपन) : जोडीहरू जसले कम्तीमा एक वर्षसम्म गर्भधारण गरेनन् भने
२. Secondary infertility (द्वितीय बाझाेपन) : एक पटक गर्भवती हुने क्षमता भएको तर असमर्थ छन् भने
महिलामा बाझोपनको समस्या हुने कारणहरू :
१. उमेर
२. थाइराइड राेग
३. मधुमेह
४. डिम्बग्रन्थी अल्सर /पालिसिस्टिक अन्डाशय सिन्ड्रोम (PCOS)
५. ट्युब अवरोध
६. ओभुलेशन डिसअर्डर
७. गर्भाशय फाइब्राएडहरू
८. एन्डोमेट्रियोसिस
९. धुम्रपान/मद्यपान
१०. तौल
११. खानपिन
१२. यौन इतिहास
१३. हर्मोनल असन्तुलन
पुरुषमा बाझोपनको समस्या हुने कारणहरु ः
१. असामान्यतया शुक्राणु उत्पादन वा कार्य
२. कम शुक्राणु गणना
३. नलिका/नलिका उल्टो असफलता
४ . हर्मोन असन्तुलन
५. धुम्रपान/मद्यपान
६ . तौल
७. खानपिन
८. यौन इतिहास
९. यौन सङ्क्रमण, चोट, शल्यक्रिया आदि
(डा. अनुपमा सुवाल गुरुङ भेनस अस्पतालमा स्त्री रोग तथा आईभीएफ, निःसन्तानपन विशेषज्ञका रूपमा कार्यरत हुनुहुन्छ ।)
उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।
डा. गुरुङ भेनस अस्पतालमा स्त्री रोग तथा आईभीएफ, निःसन्तानपन विशेषज्ञका रूपमा कार्यरत हुनुहुन्छ ।