लालीगुराँसको अध्ययन गर्न तथा पर्यटक आगमन बढाउन म्याग्दीको फूलबारीमा गुराँसपार्क बन्दै

जेठ १५, २०७८ शनिबार ११:३८:५४ | प्रताप बानियाँ

म्याग्दी - लालीगुराँसका प्रजातिको बारेमा जानकारी दिन तथा पर्यटकहरुको आगमन बढाउनका लागि म्याग्दीमा गुराँस पार्कको निर्माण थालिएको छ । उत्तरी म्याग्दीको अन्नपूर्ण गाउँपालिका-७, हिस्तानको फूलबारीमा गुराँसपार्क निर्माण गर्न लागिएको हो ।

चालु आर्थिक वर्ष २०७७/७८ मा गण्डकी प्रदेश सरकारको उद्योग, पर्यटन, वन तथा वातावरण मन्त्रालयको आर्थिक सहयोगमा डिभिजन वन कार्यालय म्याग्दीमार्फत हिस्तानको नेशरानी सामुदायिक वनको पर्यटकीय क्षेत्र फूलबारीमा गुराँस पार्कको निर्माण कार्य भइरहेको छ । गुराँस पार्कको अहिलेसम्म झण्डै ७५ प्रतिशत काम सम्पन्न भएको डिभिजन वन कार्यालय म्याग्दीले जनाएको छ ।

मन्त्रालयको ९ लाख ६० हजार रुपैयाँ र स्थानीय श्रमदान एक लाख १० हजारसहित कुल १० लाख ७० हजार रुपैयाँको लागतमा गुराँस पार्क निर्माणको काम भइरहेको डिभिजन वन कार्यालय म्याग्दीका निमित्त प्रमुख सन्तोष खनालले बताउनुभयो । उहाँले नेशरानी सामुदायिक वनको फूलबारीमा बन्ने पार्कमा गुराँस सूचना केन्द्र (गोलघर), शौचालय र गेट निर्माणको काम तीव्र गतिमा भइरहेको जानकारी दिनुभएको छ ।

याे गुराँस पार्कभित्र नेपालमा पाइने लालीगुराँसका ३१ वटै प्रजातिको विरुवाहरु रोपिने भएको छ । त्यसमध्ये पूर्वी नेपालको सङ्खुवासभा जिल्लाबाट २२ प्रजातिका गुराँसको बिरुवा ल्याउने र बाँकी म्याग्दीको सामुदायिक वनबाट बिरुवा लगेर पार्कमा रोपिने वन कार्यालयका निमित्त प्रमुख खनालको भनाइ छ ।

नेशरानी सामुदायिक वनको आधा हेक्टर क्षेत्रफलको जमिनमा गुराँस पार्क बनाउन लागिएको यस वन समूहका अध्यक्ष लालबहादुर गर्बुजाले बताउनुभयो । गुराँस पार्कभित्र नेपालमा पाइने ३१ प्रजातिका गुराँसका बिरुवाहरु रोप्ने, तिनीहरुको रङ्गिन फोटो टाँस्ने, अंग्रेजी र नेपाली दुवैमा गुराँसको नाम लेखेर राखिने योजना छ । पार्कभित्र गुराँसको प्रजातिका विषयमा जानकारीमूलक सूचनाहरु राखिनेछ भने गुराँसपार्क निर्माणपछि पर्यटकको आकर्षण बढ्नुका साथै गुराँसको बारेमा जानकारी लिन सहज हुनेछ ।

म्याग्दी जिल्लाको वन क्षेत्रमा करिब १० प्रजातिका गुराँसहरु पाइन्छन् । गण्डकी प्रदेशमा गुराँसको राजधानी र सबैभन्दा ठूलो गुराँसे जङ्गल म्याग्दीको अन्नपूर्ण गाउँपालिकामा पर्ने पुनहिल-घोडेपानी र राम्चे क्षेत्रलाई मानिएको छ । यस क्षेत्रमा मात्रै विभिन्न ८ प्रजातिका लालीगुराँसहरु पाइन्छन् ।

नेपालमा सबैभन्दा ठूलो गुराँसको जङ्गल सङ्खुवासभा, ताप्लेजुङ र तेह्रथुम जिल्लाको सङ्गमस्थलमा पर्ने तिनजुरे-मिल्के-जलजले (टीएमजे) संरक्षित क्षेत्रलाई मानिन्छ । यसलाई नेपालमा गुराँसको राजधानीसमेत भनिन्छ । लालीगुराँसलाई नेपाल सरकारले राष्ट्रिय फूलको मान्यता दिएको छ ।

अन्तिम अपडेट: मंसिर २, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

प्रताप बानियाँ

म्याग्दीमा बसेर पत्रकारिता गर्ने प्रताप बानियाँ उज्यालोका जिल्ला सम्वाददाता हुनुहुन्छ । उहाँले मुस्ताङका खबर पनि सम्प्रेषण गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्