मेराे जेठानलाई मन्त्री बनाउनुस् भनेर मैले कहीँ भनेकाे छैन, नाता पर्नु दुर्भाग्य : प्रधानन्यायाधीश

 कात्तिक ७, २०७८ आइतबार १६:३८:० | उज्यालो सहकर्मी
unn.prixa.net

फाइल फाेटाे

काठमाण्डाै – प्रधानन्यायाधीश चोलेन्द्रशम्शेर जबराले गजेन्द्र हमाललाई मन्त्री बनाउनमा आफ्नो कुनै पनि संलग्नता नहरेको प्रष्ट पार्नुभएको छ । 

प्रधानन्यायाधीश समक्ष आज आइतवार नेपाल बार एसोसिएशनका अध्यक्षसहित पदाधिकारीसँगको भेटमा उहाँले मन्त्री बनाउनका लागि कुनै पनि नेतालाई नभनेको बताउनुभएको हो । 

‘मेरो जेठानलाई मन्त्री बनाउनुस् भनेर मैले कहीँ पनि भनेको छैन, मेरो नाता पर्नु दुर्भाग्य हो, तर यसमा मेरो कुनै संलग्नता छैन’, प्रधानन्यायाधीश राणाले भनेको कुरालाई बैठकपछि पत्रकारसँग बारका महासचिव लीलामणि पौड्यालले जानकारी दिनुभयो ।

प्रधानन्यायाधीश राणाले न्यायालय सुधारका विषयमा बारले उठाउँदै आएका सम्पूर्ण विषयमा आफू गम्भीर रहेको र त्यसका लागि तत्काल काम सुरु गर्ने छलफलमा बताउनुभएको जनाइएको छ । समग्र न्यायालय सुधारका विषयमा भाेलि सोमवार प्रधानन्यायाधीशसहित सर्वोच्च अदालतका सम्पूर्ण न्यायाधीशको पूर्ण बैठक (फुल कोर्ट) बस्ने र त्यस बैठकमा बार पनि सहभागी भएर वृहत् छलफल गर्ने तय भएको छ ।

बारले न्यायाधीश हरिकृष्ण कार्कीको संयोजकत्वमा गठित समितिले बनाएको प्रतिवेदन कार्यान्वयन नगरेको, स्वतन्त्र न्यायपालिका निर्माणमा तदारुकता नदेखाएको भन्दै बारको गएकाे शुक्रवारको निर्णयानुसार आज प्रधानन्यायाधीशलाई भेट गरी ध्यानाकर्षण गराएको हो ।

बारका अध्यक्ष चण्डेश्वर श्रेष्ठले प्रधानन्यायाधीशसँग समसामयिक विषयमा समग्रमा कुराकानी भएको र भाेलि बस्ने सर्वोच्च अदालतको पूर्ण बैठकमा थप छलफल भइ निष्कर्षमा पुग्ने बताउनुभयो ।

त्यो सुझावअनुसार पर्सि मङ्गलवार नै त्यसको काम सुरुवात गर्ने पनि भेटमा छलफल भएको बारका महासचिव पौडेलले जानकारी दिनुभयो । 

अन्तिम अपडेट: चैत २, २०८०

तपाईको प्रतिक्रिया