मनाङको तिमाङ र सिन्धुपाल्चोकको गौरीशंकर संरक्षण क्षेत्रकाे जङ्गलमा लागेको डढेलो अझै निभाउन सकिएन

माघ २२, २०८१ मंगलबार ७:४३:२२ | उज्यालो सहकर्मी

काठमाण्डौ – मनाङको तिमाङ र सिन्धुपाल्चोकको गौरीशंकर संरक्षण क्षेत्रअन्तर्गतको वनमा शुक्रवारदेखि लागेको डढेलो अहिलेसम्म नियन्त्रणमा आउन सकेको छैन ।

चीनसँग जोडिएको सिन्धुपाल्चोकको भोटेकोशी–२ लिपिङको माथिल्लो क्षेत्रको वनमा शुक्रवारदेखि डढेलो लागेको हो ।

लिपिङ खोलामा निर्माणाधीन लिपिङ खोला जलविद्युत् आयोजनाको टनेल साइडमा शुक्रवार वेल्डिङ गर्ने क्रममा करेन्ट सर्ट भएर आगो सल्किएको प्रारम्भिक अनुमान छ ।

डढेलोले सीमा क्षेत्रको राङबुसा गाउँ जोखिममा परेको छ । हिजो अग्निरेखा बनाएर गाउँमा डढेलो पस्न नदिने प्रयास गरिएको सिन्धुपाल्चोक प्रहरीले जनाएको छ ।

अस्ति आइतवार सिम्रिक एअरको हेलिकोप्टरबाट पानी ओसारेर डढेलो निभाउने प्रयास गरिएको थियो । भोटेकोशी नदीको पानी ओसारेर खन्याइए पनि डढेलो ननिभेपछि हिजो हेलिकोप्टर फर्किएको थियो ।

सिन्धुपाल्चोकका प्रमुख जिल्ला अधिकारी किरण थापाले प्रयास गरिए पनि डढेलो निभाउन नसकिएको बताउनुभएको छ ।

यस्तै मनाङको तिमाङ जङ्गलमा शुक्रवार बेलुकीदेखि शुरू भएको डढेलो निभाउन सकिएको छैन ।

चामे गाउँपालिका–१ तिमाङ जङ्गलमा लागेको डढेलो नियन्त्रणमा लिन नसकिएको जिल्ला प्रशासन कार्यालय मनाङले जनाएको छ ।

प्रमुख जिल्ला अधिकारी मातृका आचार्यले डढेलोसँगै फैलिएको आगो निभाउन जिल्लाका तीनवटै सुरक्षा निकाय परिचालन गरिए पनि नियन्त्रणमा लिन नसकिएको जानकारी दिनुभयो ।

उहाँका अनुसार आगो निभाउन प्रयास चलिरहेको छ । भिर क्षेत्रमा आगलागी भएकाले अहिलेसम्म बस्तीमा जोखिम नरहेको उहाँको भनाइ छ ।

अन्नपूर्ण संरक्षण क्षेत्र आयोजना इलाका मनाङका प्रमुख ढकबहादुर भुजेलले यो समय सुक्खायाम भएकाले आगो फैलिएको हो । सुक्खायाममा वनजङ्गलमा रहेका सुकेका ठुटाले गर्दा पनि आगो फैलिएको छ ।

हिजोसम्म जङ्गलको झण्डै डेढ हेक्टर क्षेत्रफलमा आगलागी भइरहेको भुजेलले जानकारी दिनुभयो । उहाँका अनुसार वनआलु, लौडसल्ला, जटामसी, पाँचऔँले, गुची च्याउलगायत जडीबुटीसमेत आगलागीले क्षति गरेको छ ।

आगलागीका कारण चराचुरुङ्गी, वन्यजन्तुको बासस्थानमा प्रभाव पार्ने गर्छ । २०७७ सालमा मङ्सिर २ गतेदेखि लागेको आगो दुई महिनापछि मात्रै नियन्त्रण आएको थियो । त्यसबेला मनाङको एक हजार दुई सय हेक्टर वनजङ्गल नष्ट भएको थियो ।

अन्तिम अपडेट: माघ २२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

मनाङको तिमाङ र सिन्धुपाल्चोकको गौरीशंकर संरक्षण क्षेत्रकाे जङ्गलमा लागेको डढेलो अझै निभाउन सकिएन

तस्बिर : रासस

तपाईको प्रतिक्रिया