काठमाण्डाै – नेपाली कांग्रेसका नेता डा. प्रकाशशरण महतले नवनिर्वाचित पार्टी सभापति शेरबहादुर देउवाले आउँदाे आमचुनावमा पार्टीलाई एक बनाएर लैजाने बताउनुभएको छ । 

आज बुधवार नवनिर्वाचित पार्टी सभापति शेरबहादुर देउवालाई बधाई दिन प्रधानमन्त्री निवास बालुवाटार पुग्नुभएका नेता महतले आउँदाे आमचुनावमा पार्टीलाई एक बनाएर लैजान सक्ने खुबीका कारण सभापतिमा देउवाले जित्नुभएको बताउनुभएको हो ।

देउवाले सबै नेतालाई जोड्न सक्ने र कसैलाई पनि असुरक्षाको अनुभूति हुन नदिने उहाँले बताउनुभयो । सभापति देउवाको यो दोस्रो कार्यकालमा पार्टीलाई आधुनिक, सुदृढ, विस्तारित र गतिशील पार्टीको रूपमा निर्माण गर्ने उहाँको भनाइ छ ।

नेता महतले भन्नुभयो, ‘उहाँलाई समग्र पार्टी पङ्क्तिले समर्थन गरेका हेर्दा उहाँ सबै नेतालाई जोड्न सक्नुहुन्छ भन्ने थाहा हुन्छ । कसैलाई पनि असुरक्षाको अनुभुति हुने परिस्थिति आउँदैन भन्ने विश्वासले नै सबैले उहाँलाई सहयोग पनि गर्नुभयो । मलाई के कुरामा विश्वास छ भने आउँदाे आमचुनावमा पार्टीलाई एक बनाएर लान सक्ने खुबीका कारण नै उहाँ दोस्रो कार्यकालमा निर्वाचित हुनुभएकाे हाे । उहाँको दोस्रो कार्यकालमा हामी पार्टीलाई आधुनिक, सुदृढ, विस्तारित, नागरिक केन्द्रित, देश केन्द्रित, देशको स्वार्थ र आवश्यकता केन्द्रित पार्टी बनाउँछाैँ । उहाँ सबैलाई व्यवस्थापन गर्नुहुन्छ । शेरबहादुरजीको मूल खुबी नै व्यवस्थापन गर्न सक्नु हाे ।’

पार्टी सभापतिमा दोस्रो पटक निर्वाचित प्रधानमन्त्री शेरबहादुर देउवालाई बधाई तथा शुभकामना व्यक्त गर्न प्रधानमन्त्री निवास बालुवाटारमा भिड लागेको छ । नेता, कार्यकर्ताले प्रधानमन्त्री देउवालाई भेटेर बधाई तथा शुभकामना दिइरहेका छन् । देउवालाई बधाई दिन बालुवाटार पुग्नुभएका नेपाली कांग्रेसका नेता अब्दुल सतारले प्रधानमन्त्री देउवाले आउँदाे चुनावमा पार्टीलाई दुई तिहाइ बहुमत दिलाउनका लागि पार्टीलाई एकताबद्ध बनाएर लैजाने विश्वास व्यक्त गर्नुभयो । 

नेता सतारले पार्टी सभापति एवम् प्रधानमन्त्री देउवालाई नेपाली कांग्रेसका नेता, कार्यकर्ता काँधमा काँध जोडेर सहयोग गर्न तयार रहेको बताउनुभयो ।