काठमाण्डाै – प्रधानमन्त्री कप टी–२० राष्ट्रिय क्रिकेट प्रतियोगितामा एपीएफ क्लबले प्रदेश नम्बर २ लाई २४ रनले हराउँदै विजयी सुरुवात गरेकाे छ । 

कीर्तिपुरकाे त्रिवि मैदानमा आज साेमवार भएकाे खेलमा एक सय ६४ रनको लक्ष्य पछ्याएको प्रदेश २ ले २० ओभरमा नाै विकेट गुमाएर एक सय ३९ रनमात्र बनाउन सक्याे । उसका हरिशंकर साहले २६ बलमा ३६ रन र मोहमद आदिल आलमले १४ बलमा ३५ रनको योगदान गरे पनि त्यो जितका लागि पर्याप्त भएन ।

बलिङतर्फ एपीएफका लागि अविनाश बोहरा, भुवन कार्की र कमल ऐरीले समान दुई/दुई विकेट लिए । यस्तै शरद भेषवाकर र किशोर महतोको नाममा एक/एक विकेट रह्यो ।

यसअघि टस जितेर ब्याटिङ गरेकाे एपीएफले २० ओभरमा पाँच विकेट गुमाएर एक सय ६३ रन जोडेको थियो । एपीएफका लागि आसिफ शेखले ६३ र प्रदीप ऐरीले ६० रनको योगदान गरे ।

बलिङतर्फ प्रदेश २ का रितेश सिंहले चार विकेट हात पार्दा विवेक यादवले एक विकेट लिए ।