काठमाण्डाै - उच्च अदालत बार एसाेसिएशन पाटनको नयाँ कार्यसमिति अध्यक्षमा शान्तिराम खतिवडा विजयी हुनुभएको छ । उहाँ १ हजार ६६ मत ल्याएर विजयी हुनुभएको हो । उहाँका प्रतिस्पर्धी रामकृष्ण शर्माले २ सय ७१ मत प्राप्त गर्नुभएको छ ।

त्यस्तै उपाध्यक्षमा रामचन्द्र न्यौपाने १ हजार २३ मत ल्याएर विजयी हुनुभएको छ भने उहाँका प्रतिस्पर्धी नारायण खरेलले २ सय ८४ मत प्राप्त गर्नुभएको छ । सचिवमा रवीन्द्रकुमार ढुङ्गाना, सहसचिवमा इन्दु कार्की, कोषाध्यक्षमा मिलन श्रेष्ठ विजयी हुनुभएको छ ।     

त्यस्तै १४ जना सदस्यमा रमति महर्जन, भवानी भट्टराई, ईश्वरप्रसाद पुडासैनी, ओमप्रकाश चौधरी, श्याम रोक्का, धर्मराज पौडेल, राजाराम घिमिरे, लावण्यराज कार्की, धनजित बस्नेत, शुलभ खनाल, सरीता आचार्य, रामकुमार खतिवडा, भावेश गौतम र सागर शर्मा विजयी हुनुभएको हो ।  

देशका ९० बार एकाईमध्ये सबैभन्दा बढी सदस्य सङ्ख्या २ हजार ८ सय २८ मतदाता पाटन बारमा छन् । २०औँ नयाँ कार्यसमितिका लागि प्रजातान्त्रिक समूहबाट शर्मा र प्रगतिशील समूहबाट खतिवडाले नेतृत्वमा प्रतिस्पर्धा गर्नुभएको थियो ।

प्रगतिशील समूहमा एमाले र नेकपा (एकीकृत समाजवादी) निकट कानुन व्यवसायी थिए । नयाँ कार्यसमितिमा पाँच पदाधिकारी र १४ सदस्य गरी १९ सदस्यीय नयाँ कार्यसमिति चयन भएको छ । नयाँ कार्यसमिति पदावधि दुई वर्षको हुनेछ ।