महानगरले राहदानी विभागकाे 'बेसमेन्ट' खाली गरायाे (तस्बिरहरू)

भदौ १०, २०७९ शुक्रबार १६:५४:३ | उज्यालो सहकर्मी

काठमाण्डाै – काठमाण्डाै महानगरपालिकाले त्रिपुरेश्वरमा रहेकाे राहदानी विभागको बेसमेन्टमा रहेका संरचनाहरू हटाएको छ ।

शुक्रवार महानगरपालिकाले राहदानी विभागको बेसमेन्टमा रहेका संरचनाहरू हटाएको हो । सेवा लिन जाने सेवाग्राहीले आफ्ना गाडी विभागबाहिर नै पार्किङ गर्नुपर्ने बाध्यता रहेकाले गाडी आउजाउमा समस्या आएको गुनासो गरेपछि महानगरपालिकाले अध्ययन गरेर बेसमेन्टरमा रहेका संरचनाहरू हटाएको हो । अनुगमनका क्रममा विभागले सवारी पार्किङका लागि छुट्याउनुपर्ने बेसमेन्टमा प्रतिक्षालय बनाएको पाइएको थियो । महानगरपालिकाले बेसमेन्टमा रहेका संरचनासहित बेञ्चहरू हटाएर पार्किङका लागि खाली गराएको छ ।

अवैध संरचना हटाइसकेपछि सञ्चारकर्मीसँगको कुराकानीमा काठमाण्डाै महानगरपलिकाका नगर प्रहरी बलका प्रमुख नगर प्रहरी उपरीक्षक राजु पाण्डेले महानगरभित्र यसरी अवैध संरचना बनाएका ठाउँ तीन सय वटाभन्दा बढी रहेको जानकारी आएको बताउनुभयो । उहाँले भवन निर्माण गर्दा के प्रयोजनका लागि नक्सा पास गरिएको हो भन्ने कुरा स्पष्ट खुलाइएकोले प्रयोजनअनुसारकाे काम गर्नुपर्ने बताउनुभयो । नागरिकले पनि आफ्नो तहबाट जिम्मेवारी भूमिका निर्वाह गर्नुपर्ने उहाँकाे भनाइ छ ।

काठमाण्डाै महानगर क्षेत्रका व्यावसायिक प्रतिष्ठानका भवन र सार्वजनिक भवनमा गाडी पार्किङका लागि भनेर बेसमेन्ट बनाउन ‘कर छुट’ को सुविधा लिइए पनि अन्य प्रयोजनमा प्रयोग भएको पाइएपछि महानगरपालिकाले साउन महिनामा नै ३५ दिने सूचना जारी गरेको थियो । त्याे सूचनाको पालना गरेको नपाइएपछि महानगरपालिकाले स्थलगत अनुगमन नै थालेर अवैध संरचनाहरू हटाउन सुरु गरेको थियो । संरचना हटाएपछि राहदानी विभागले भने भवनको नक्साअनुसार बेसमेन्टमा पार्किङ राख्ने पहल गर्ने जनाएको छ ।

यसैबीच राहदानी विभागले अब बेसमेन्टमा आउँदाे आइतवारदेखि पार्किङ हुने जनाएकाे छ । विभागले सूचना नै निकालेर याे जानकारी दिएकाे हाे ।

अन्तिम अपडेट: माघ ८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्