काठमाण्डौ – नेपाल संवत्को अवसरमा ललितपुरको गोदावरी नगरपालिकामा बुधवार साइक्लोथन अर्थात् साइकल यात्रा भइरहेको छ । 

बिहान साढे ७ बजेदेखि सुरु साइकल यात्रा गोदावरी नगरपालिका, गोदावरी उद्योग वाणिज्य संघ, पर्यटन बोर्ड लगायत संघ–संस्थाको सहकार्यमा भइरहेको हो ।

गोदावरी नगरपालिकाको कार्यालयबाट सुरु भएको साइकल यात्रा ५० किलोमिटर लामो हुने गोदावरी उद्योग वाणिज्य संघका अध्यक्ष जगन्नाथ महर्जनले बताउनुभयो ।

नगरपालिका भित्र रहेका पर्यटकीय गन्तव्यलाई प्रवर्द्धन गर्ने उद्देश्यले साइकल यात्रा सुरु गरिएको उहाँले बताउनुभयो ।

उहाँका अनुसार तीन सय जना साइकल यात्रीले ५० किलोमिटर यात्रा पार गरेर गोदावरी नगरपालिका भित्रका विभिन्न धार्मिक र पर्यटकीय क्षेत्रको उजागर गर्दैछन् ।

इको–टुरिज्म प्रवर्द्धन गर्ने उद्देश्यले भइरहेको साइकल यात्राले राष्ट्रिय महत्व बोकेको छ । अरू पालिका वा सामान्य नागरिकका लागि पनि यो कार्यक्रम महत्वपूर्ण हुने महर्जनले बताउनुभयो ।