विद्युत् आयोजनाले मापदण्डको ख्याल नगर्दा सोलु खोला बगरमा परिणत

माघ १७, २०७९ मंगलबार १६:४३:८ | सुवास दर्नाल

साेलुखुम्बु – सोलुखुम्बुमा निर्माण गरिएको जलविद्युत् आयोजनाले न्यूनतम मापदण्डको ख्याल नगर्दा सोलु खोला बगरमा परिणत भएको छ । जिल्लामा निर्माण सम्पन्न भएर बिजुली उत्पादन सुरु गरेको ९ दशमलव ५ मेगावाटको मध्य सोलु खोला जलविद्युत् आयोजनाले मापदण्डको ख्याल नगर्दा अहिले सोलु खोला सुक्खा बगरमा परिणत भएको हो ।

खोलामा बगिरहने पानी आयोजनाले सबै लगेपछि अहिले सोलुदुधकुण्ड नगरपालिका ३ र ४ क्षेत्रको खोला नै सुक्खा बनेको छ । विद्युत् विकास विभागको नियमअनुसार आयोजना निर्माण गर्दा कम्तीमा १० प्रतिशत पानी खोलामा छोड्नुपर्ने मापदण्ड भए पनि यहाँका आयोजनाले त्यसलाई पालना गरेका छैनन् । जसका कारण सोलु खोलाको जलप्राणीहरूको अस्थित्व नै गम्भीर सङ्कटमा परेको स्थानीय दावा तामाङले बताउनुभयो ।

जिल्लामा तल्लो सोलु खोला, माथिल्लो सोलु खोला, बेनी, लिखु खोला लगायत आधा दर्जनभन्दा बढी आयोजना निर्माणाधीन अवस्थामा छन् । धेरैजसाे आयाेजनाले खोलामा मापदण्डअनुसारको पानी छाड्न आनाकानी गरिरहेका स्थानीयले बताएका छन् ।

यसैबीच सोलु खोलाको पानी सुकाएर बगरमा परिणत भएपछि अहिले सोलु खोला नै क्रसरहरूको नदीजन्य पदार्थ उत्खनन गर्ने थलो बनेको छ । खोलामा पानी नभएपछि क्रसर उद्योगहरूले गाडी नै खोलामा लगेर ढुङ्गा उत्खनन गर्न थालेका छन् । रोजगार दिने भन्दै क्रसर उद्योगीहरूले आफूहरूलाई खोलाभित्रको ढुङ्गा निकाल्न लगाएको स्थानीय रमन तामाङले बताउनुभयो ।

जलविद्युत् आयोजनाले सामान्य मापदण्ड पालनामा ख्याल नगर्नु र खोलाको ढुङ्गा क्रसरले धमाधम उत्खनन गरिरहँदासमेत पालिकादेखि प्रशासनसमेत मौन छ । जसका कारण वातावरणदेखि प्राणी जगतको जीवनचक्रमा समेत खलल पुग्न सक्ने वातावरण विज्ञ राजन थापा चिन्ता व्यक्त गर्नुहुन्छ । जङ्गली जनावर तथा जल प्राणीहरूको अस्थित्व जोगाउनसमेत खोलामा कम्तीमा १० प्रतिशत पानी छोड्नैपर्ने थापाको भनाइ छ ।

अन्तिम अपडेट: मंसिर ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

सुवास दर्नाल

उज्यालोका सोलुखुम्बु सहकर्मी सुवास दर्नाल हिमाल एफएममा पनि कार्यरत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्