३ वर्षदेखि टहरामा बिजमायाकाे परिवार, हिउँ र पानी छेक्नै गाह्राे

माघ २०, २०७९ शुक्रबार ८:४८:४३ | नेत्र शाही

जुम्ला – ‘सर म यो हिउँको सिजनमा पनि सुत्न पाइनँ, कपडा पूरै पानीले भिजेका छन् । तीन वर्षदेखि फराकिलो तरिकाले सुत्न पाएको छैन । छोराछोरी ठूला भइसके, त्यो टहरामा नअट्ने भइसक्यो । मेरो कोही भगवानले सानो घर लगाइदिन्छ कि ?’, जुम्लाको गुठीचौर ५ फोइगाउँकी ४० वर्षीया बिजमाया जैसीले गुनासो पीडा पोख्नुभयो ।

पत्रकार महासङ्घ जुम्लामा आउनुभएकी बिजमायाको परिवारको कथा कठिन छ । उहाँ तीन वर्षदेखि आवासका लागि महासङ्घ मात्रै नभई सम्बन्धित निकायमा धाइरहनुभएको छ । तीन वर्षअघि हिमपातले घर भत्किएपछि उहाँ गाउँलेको सहयोगमा सानो टहरा बनाएर बसिरहनुभएको छ । .

१२ वर्षअघि रोजगारीका लागि भारत गएका श्रीमान् बिरामी भएर रित्तो हात घर फर्किएपछि बिजमायाले माइतीले दिएको जग्गामा टहरो बनाएर बसिरहनुभएको हाे । उहाँ भन्नुहुन्छ, ‘ चुल्होमै पानीको ताल पर्छ । घाम लाग्नु हुँदैन टहराभित्रै पसेर पोल्ने गर्छ । ओढ्ने ओछ्याउने लत्ताकपडा पनि खासै छैनन् ।’ विभिन्न निकाय र सम्बद्ध पक्षसँग निवेदन दिए पनि आर्थिक सहयोग जुट्न नसक्दा उहाँको आवास अहिलेसम्म बन्न सकेको छैन ।

घर भत्किएपछि गाउँपालिकाले १५ हजार रुपैयाँ राहत दिएको थियो । ‘त्यसै बेला छोराको खुट्टा भाँचिएपछि त्यो रकम उपचारमै खर्च भयो’, उहाँले भन्नुभयो । जीविकोपार्जन सुधारका लागि पालिकाले साना–ठूला गरी १० वटा बाख्रा पनि दिएको थियो । तर साना बालबच्चा स्कुल पढ्ने हुँदा अर्काको भरमा वनमा छाड्दा पाटनको विष खाएर मरेका उहाँले गुनासो गर्नुभयो ।

बिजमायाका १३ वर्षकी छोरी र १५ वर्षका छोरा छन् । उनीहरू त्रिभुवन माध्यमिक विद्यालय झारजुवालामा पढ्छन् । छोरी ६ र छोरा १० कक्षामा पढ्छन् । विद्यालयको पोसाक किन्न नसकेका कारण उनीहरू नियमित विद्यालय जान नमान्ने गरेका उहाँले सुनाउनुभयो ।

गुठीचौर गाउँपालिकाका अध्यक्ष दानबहादुर बुढाले बिजमायाको विषय प्राथमिकतामा पर्ने प्रतिबद्धता जनाउनुभएको छ । गाउँपालिकाकी उपाध्यक्ष शान्ति मल्ल भण्डारीले बिजमायको बारेमा जानकारी लिएको र आफ्नो कार्यकालमा उहाँको आवास, गाँस र बालबालिकाको शिक्षाका लागि पहल गर्ने बताउनुभयो ।

सहरी विकास तथा भवन डिभिजन आयोजना जुम्लाका सब इन्जिनियर चन्द्र खड्काका अनुसार सुरक्षित नागरिक आवास कार्यक्रमअन्तर्गत ७५ हजार रुपैयाँ दिने व्यवस्था रहेको छ । यो कार्यक्रम पालिका मातहतमा रहेको उहाँले बताउनुभयो ।

नेपालको संविधानमा आवासको अधिकारलाई मौलिक हकमा राखिए पनि तीनै तहका सरकारले व्यवस्थापन गर्न सकेका छैनन् । आवासको अधिकारसम्बन्धी ऐन २०७५ मा नेपालको संविधान बमोजिम आवासविहीन नेपाली नागरिकलाई उपयुक्त र सुरक्षित आवास सुविधा उपलब्ध गराउने उल्लेख गरेको छ ।

अन्तिम अपडेट: मंसिर ६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

नेत्र शाही

जुम्लामा बसेर पत्रकारिता गर्ने नेत्र शाही उज्यालोका जिल्ला सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्