खोटाङ – खोटाङमा प्रदेश सांसद पाँचकर्ण राई विरुद्ध प्रदर्शन गर्ने पहिचान पक्षधर चार युवा पक्राउ परेका छन् ।

कोशी प्रदेश नामाकरणको पक्षमा मतदान गरेको भन्दै सांसद राई विरुद्ध शनिबार प्रदर्शनमा उत्रिएका किरात राई यायोक्खा खोटाङका अध्यक्ष युगसन किरात, सह–कोषाध्यक्ष डार्विन राई, यायोक्खा दिक्तेल रुपाकोट मझुवागढी नगर कमिटिका पूर्व उपाध्यक्ष सप्तमणि राई र जसपाका जिल्ला सचिव सुनिल चाम्लिङ पक्राउ परेका हुन् । 

जिल्ला समन्वय समितिको आयोजनामा जिल्लासभा सञ्चालन भइरहकै बेला किरातराई यायोक्खाका अध्यक्ष किरातले कार्यक्रम सञ्चालकसँग समय मागेर आफ्नो धारणा राखेपछि नाराबाजी गर्दै कालो झण्डा देखाइएको थियो । विरोधमा उत्रिएका समूहले प्रदेश सांसद राईलाई कालो मोसो दल्ने प्रयास गरेका थिए । 

विरोधमा उत्रिएका समूहले प्रदेश सांसद भूपेन्द्र राई विरुद्ध पनि नाराबाजी गरेका थिए । कार्यक्रममा प्रतिनिधिसभा सांसद रामकुमार राई पनि उपस्थित थिए । पक्राउ परेका चारै जना केही बेरमै छुटेका छन् ।