खोटाङ – ठेकेदारको ढिलासुस्तीका कारण मध्यपहाडी राजमार्गअन्तर्गत खोटाङको दिक्तेल रुपाकोट मझुवागढी नगरपालिका–८ बुवालुङ र लामीडाँडा जोड्ने पंखु खोला पुलको ठेक्का सम्झौता तोडिएको छ । 

ठेकेदार कम्पनी सिरुवा कन्ट्रक्सन प्रालिले पटक–पटक सम्झौता म्याद गुजार्दा पनि काम सम्पन्न नगरेका कारण पुष्पलाल (मध्यपहाडी) राजमार्ग योजना कार्यालय सित्खा रामेछापले पुलको ठेक्का सम्झौता तोडेको हो । सम्झौता म्याद नाघेको पाँच वर्षपछि कार्यालयले पुनः टेन्डर गर्ने गरी पंखु खोला पुलको ठेक्का अन्त्य गरेको जनाएको छ । ठेक्का तोडिएसँगै कन्सल्ट्यान्ट डिजाइनरले पुल निर्माणस्थल हेरेर फर्किएको पुष्पलाल (मध्यपहाडी) राजमार्ग योजना कार्यालयले जनाएको छ । 

१५ मिटर लम्बाइ हुने पंखु खोला पुल दुई करोड २९ लाख रुपैयाँमा बनाउने गरी सिरुवा कन्ट्रक्सनले २०७२ असोज ७ गते ठेक्का सम्झौता गरेको थियो । २०७३ असोज ७ गतेसम्ममा सम्पन्न गर्ने गरी पहिलो ठेक्का लागेको पुलको अहिलेसम्म दुईतिरको पिलर ठड्याउने बाहेककाे प्रगति भएको छैन । पुल नहुँदा स्थानीय बर्खायाममा जोखिम मोलेर खोला तर्न बाध्य छन् । 

ठेकेदारले मध्यपहाडी राजमार्गको चखेवा भञ्ज्याङ–दिक्तेल सडक खण्डमा पर्ने पुलको पिलर उठाएर वर्षाैँसम्म पुल अलपत्र पारेपछि कार्यालयले ठेक्का तोड्नका लागि गएकाे मङ्सिर १८ गते सडक विभागलाई सिफारिस गरेको थियो । ठेक्का तोड्न सिफारिस भएपछि अत्तालिएका ठेकेदारले पुस २३ गतेदेखि कामलाई शुरु गराएजस्तो गरेका थिए तर पिलरको केही भाग ढलान थप गरेका ठेकेदार फागुन १९ गतेदेखि पुलको काम ठप्प पारेर सम्पर्कविहीन भएका थिए ।