मकवानपुर – मकवानपुरको बाग्मती गाउँपालिकामा गएको पहिरोमा बेपत्ता भएकामध्ये दुई जनाको शव फेला परेको छ ।

बाग्मती गाउँपालिका वडा नम्बर ५ सिग्रेदोभानमा हिजो मङ्गलवार बिहान गएको पहिरोमा परेर बेपत्ता भएका अक्कलबहादुर स्याङ्तान र उहाँकी २२ वर्षकी छोरी शीलाकाे शव १० किलोमिटर टाढा सिन्धुलीको हरिहरपुरगढीमा रहेको बाग्मती नदी बगरमा फेला परेको जिल्ला प्रहरी कार्यालय मकवानपुरले जनाएको छ ।

पहिरोमा परेका अझै तीन जना बेपत्ता रहेका छन् । हराइरहेकामा अक्कलबहादुरका २५ वर्षका ज्वाइँ जीवन पहरी, चार वर्षका नाति मिलन र डेढ वर्षकी नातिनी दिव्या रहेका छन् । पहिरोमा परेर हिजै एक जनाको ज्यान गएको थियाे । पहिराेमा छ जना बेपत्ता भएकामा १६ वर्षका पासाङ घिसिङलाई १५ घण्टापछि जीवितै उद्धार गरी हेटौँडा अस्पतालमा उपचार भइरहेको छ ।