Ujyaalo Online

देश परदेश (अडियाे)

खाडीका कुवेत र कतार हुन् वा पूर्वी एसियाका कोरिया र मलेसिया ! अथवा युरोप र अमेरिकाका देश नै किन नहुन्, अब धरतीका सातै महादेशमा नेपाली नपुगेका देश छैनन् । विदेशमा नेपालीले नगरेका काम पनि अब थोरै मात्र छन् । वैदेशिक रोजगारी, अध्ययन, अनुसन्धान, ब्यवसाय र जागीरका सिलसिलामा विदेशमा रहेका नेपालीको संख्या झण्डै ५० लाख पुगेको छ । त्यसमध्ये आधाभन्दा बढी जनशक्ति वैदेशिक रोजगारीका सिलसिलामा विदेश पुगेको छ । देश परदेश वैदेशिक रोजगारीमा जाने र गएका नेपालीलाई सुरक्षित, व्यवस्थित र मर्यादित वनाउने मल्टिमिडिया प्लेटफर्म हो । यो प्लेटफर्ममा रेडियो र अनलाईन एकअर्कासित अन्तरंग जोडिएका छन् । विदेश जान चाहने नेपाली र विदेशमा रहेका नेपालीका भावना, भोगाई, चासो र सरोकारका बिषय र घटनाहरु यो प्लेटफर्मका मुख्य बिषयबस्तु हुन् । यिनै बिषयमा हरेक मंगलवार बिहान ८ः२० देखि ९ः०० बजेसम्म देशभरिका सयभन्दा धेरै स्टेशनबाट रेडियो कार्यक्रम देश परदेश प्रसारण हुन्छ । विदेशमा काम गर्न जाने र विदेशमा काम गरिरहेका नेपालीका काम, सीप र कमाईसँग सम्बन्धित अनुभव, कथाव्यथा, जानकारी, प्रश्न उत्तर र समाचार तथा टिप्पणीहरु सँगै रेडियो कार्यक्रम समेत अनलाईन पोर्टलमा समेटिन्छन् । उज्यालोको देश परदेश मल्टिमिडिया प्लेटफर्म तपाईंको साथ र सहयोगमा वैदेशिक रोजगारलाई सुरक्षित, व्यवस्थित र मर्यादित वनाउने अभियान हो । हामी तपाईंलाई आफ्ना अनुभव, सीप, कमाई, सफलता र विफलताका कथा, समाचार, टिप्पणी तथा तपाईंका भोगाई लेखेर, बोलेर र भिडियोमा पठाएर यो अभियानमा साथ दिन र सहयोग गर्न अनुरोध गर्छौ । देश परदेश मल्टिमिडिया प्लेटफर्ममा तपाईंलाई हार्दिक स्वागत छ ! 

361_Desh Paradesh 2019_05_28

कार्यक्रम देश परदेशको ३६१ औं मागपत्र प्रमाणिकरण गर्नुपर्ने नियम आएपछि भएको परिवर्तनमा केन्द्रित छ । मागपत्र प्रमाणिकरण भनेको के हो ? अनि यसबाट सरकारले गरेको अपेक्षा के हो भन्ने बारे वैदेशिक रोजगार विभागका निर्देशक भोलानाथ गुरागाईंले बुझाउनुभएको छ । मागपत्र प्रमाणिकरणपछि सरकारले अपेक्षा गरे जसरी परिवर्तन भयो त भन्ने बारेमा यूएईमा रहेको नेपाली दूतवासका श्रम सहचारी मोतिराम भुसालका कुरा कार्यक्रममा सुन्न सक्नुहुन्छ । अनि मागपत्र प्रमाणिकरणलाई  दूतावासका कर्मचारीले झन्झटिलो बनाएर घुमाउरो शैलीमा पैसा माग्न थाले भन्ने गुनासोलाई परराष्ट्र मन्त्रालयले कसरी लिएको छ भन्ने प्रश्नको मन्त्रालयका सहसचिव तथा प्रवक्ता भरतराज पौडेलले उत्तर दिनुभएको छ । यी सामग्रीसँगै हप्ताभरीका वैदेशिक रोजगार गतिविधि अनि समसामयिक विषय र तपाईंका रुचीका विषय समेटिएको राउण्ड अप पनि कार्यक्रम छ ।