सुगरत्न कंसाकार भन्छन, ‘वाइडबडी जहाज किन्ने कर्मचारीलाई राज्यले पुरस्कार दिनुपर्छ’

मंसिर ८, २०७५ शनिबार १९:४०:५० | उज्यालो सहकर्मी

काठमाडौं – नेपाल वायुसेवा निगमले दुईवटा वाइडबडी जहाज खरिद गरेर विभिन्न गन्तब्यमा उडान गरिरहेको छ ।

तर २४ अर्ब रुपैयाँ खर्च गरेर किनिएका जहाजको स्वामित्वको विषयमा धेरै बहस भैरहेका छन् । यस्तै जहाज खरिद गर्न अनियमितता भएको हुन सक्ने भन्दै प्रतिनिधिसभाको अन्तर्राष्ट्रिय सम्बन्ध समितिमा पनि छलफल भैसकेको छ ।

जहाज किन्दा प्रक्रिया नमिचिएको र जहाजको लालपूर्जा नै आफूहरुसँग सुरक्षित रहेको नेपाल वायुसेवा निगमका महाप्रबन्धक सुगतरत्न कंसाकारले बताउँदै आउनुभएको छ । जहाज किन्दा कतै न कतै अनियमितता भएको भन्दै बहस र छानबिनको माग उठिरहेका बेला महाप्रवन्धक कंसाकारले भने हरेक दिनजसो ट्वीटरमार्फत कुनै अनियमितता नभएको बरु आफूले आँट गरेको दाबी गर्दै आउनुभएको छ ।

शनिबार बिहान मात्रै ट्वीट गर्दै कंसाकारले जहाज किन्न प्रस्ताव गर्ने ११ वटा कम्पनीमध्ये सबैभन्दा सस्तोमा जहाज दिने कम्पनीसँग जहाज किनेको दाबी गर्नुभएको छ । निगमले आफ्नो स्वामित्वको प्रमाणपत्र पनि लिइसकेको उहाँको दाबी छ ।

वाइडबडीको स्वामित्वको प्रमाणपत्र पाइसक्यो। ११ वटा प्रस्ताव मध्य सवभन्दा सस्तोमा किनेको हो।विकास खर्च कम भयो भनि गुनासो भइरहेको स्थितिमा निगमले १८ महिनामा रु.२४ अर्व खर्च गरेको हो। महाप्रवन्धक मुनिको टिम, जस्ले यो सम्भव गरि दियो, उनिहररुलाई राज्यले पुरस्कार दिनु पर्ने हो!
— SugatKansakar (@SugatKansakar) November 24, 2018

विकास खर्च नभइरहेको अवस्थामा १८ महिनामै २४ अर्ब रुपैयाँ खर्च गर्ने कर्मचारीलाई राज्यले पुरस्कार दिनुपर्ने उहाँले उल्लेख गर्नुभएको छ ।

“सुगतले रिस्क लिएकोले २८ वर्ष पछि जहाज आयो, उहाँ जेलमा पनि पर्यो”- पर्यटन सचिव श्री कृष्ण प्रसाद देवकोटा, प्रतिनिधि सभा, अन्तर्राष्ट्रिय सम्बन्ध समितिको बैठकमा (२०७५ मंसिर ७ गते)
— SugatKansakar (@SugatKansakar) November 23, 2018

यस्तै कंसाकारले शुक्रबार ट्वीट गरेर जहाज किनेकोमा आफूलाई पर्यटन सचिवले धन्यवाद दिएको प्रसंग उल्लेख गर्नुभएको छ ।

धेरैको राय- वाइडबडी विमानको स्वामित्वको कागज बाहिर ल्याइदिए भईहाल्छ नि, विवाद नै सकिन्छ। त्यसैले यहि विवादबारे समाचार प्रशारण गर्न मेरो एक "बाइट" चाहियो भनि म संग कुराकानी गर्न आएका माउन्टेन टिभीको संवाददातालाई दुईवटै विमान रेजिष्ट्रेसनको कागजको फोटोकपी नै दिएर पठाएँ!
— SugatKansakar (@SugatKansakar) November 20, 2018

यस्तै गएको मंगलबार ट्वीट गरेर कंसाकारले एउटा टेलिभिजनलाई वाइडबडी जहाज दुईवटै विमान रजिष्ट्रेशनको प्रमाणपत्र नै थमाएर पठाएको उल्लेख गर्नुभएको छ ।

अन्तर्राष्ट्रिय कानून अनुसार विश्वमा उडिरहेको कुनै पनि विमानको स्वामित्व अति महत्वपूर्ण हुन्छ। यस्मा सरकारी स्वामित्वको निगम र राज्यको नियमन निकाय नागरिक उड्डयन प्राधिकरणलाई संका गर्नु भनेको नेपाली समाजमा बढ्दै गइरहेको नकारात्मक सोच र हिनताको भावनाको एक उदाहरणको रुपमा लिनु पर्छ।
— SugatKansakar (@SugatKansakar) November 20, 2018

मंगलबार नै कंसाकारले अर्को ट्वीटमा जहाज खरिदमा नभएका अनावश्यक शंका र बहसलाई नीच सोच भन्नुभएको छ ।

नेपालमा अवतरण हुनासाथ विधिवत रुपमा भंसार तिरेर नागरिक उड्डयन प्रधिकरणले विमानको मालिक निगम हो भनि सर्टिफिकेट दिइसकेको, र सोलाई नै मान्यता दिएर हंगकंग, थाइल्याण्ड, मलेशिया, भारत, दुबई र दोहाको सरकारहरुले उडान अनुमति दिइसके पछिपनि वाइडबडीको मालिक को? भनि प्रश्न सोध्नु अलि मिलेन कि?
— SugatKansakar (@SugatKansakar) November 20, 2018

त्यसै दिन नै कंसाकारले जहाजको मालिक निगम हो भने नेपाल नागरिक उडड्यन प्राधिकरणले सर्टिफिकेट दिएको अवस्था स्वामित्वको बहस गरिएको भन्दै जहाजको मालिकका विषयमा प्रश्न सोध्न जायज छैन भन्ने ट्वीट गर्नुभएको छ ।

अन्तिम अपडेट: फागुन २६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्