प्रियंका र निककाे विवाहमा हेलिकप्टरले पाहुना अाेसार्ने, विवाह हिन्दु र क्रिश्चियन दुवै रिवाजमा हुने

मंसिर ९, २०७५ आइतबार १८:६:४३ | उज्यालो सहकर्मी

अभिनेत्री प्रियंका चोपडा उनीभन्दा १० वर्ष कान्छा प्रेमी तथा अमेरिकन गायक निक जोनसका साथ यही डिसेम्बर २ र ३ मा विवाह गर्दैछिन् ।
यो जोडीको विवाह भारतको जोधपुरमा रहेको उम्मेद भवन प्यालेसमा हुनेछ ।

खबरहरुका अनुसार प्रियंका र उनका हुनेवाला दुलाहा निक हेलिकप्टरबाट विवाहस्थलमा जानेछन् । यतिमात्रै होइन यो जोडीको विवाहमा सहभागी हुने पाहुनाहरुलाइसमेत जोधपुरको एयरपोर्टबाट हेलिकप्टरमार्फत विवाहस्थलमा लैजाने व्यवस्था गरिएको छ ।

अहिले प्यालेसमा एउटा हेलिप्याडको तयारी गरिँदैछ ।

प्रियंका र निकले २९ नोभेम्बर र ३ डिसेम्बरका लागि एउटा हेलिकप्टर बुक गरेका छन् । हेलिकप्टरले जोधपुर एयरपोर्टदेखि उम्मेद भवन प्यालेससम्मका पाहुनाहरुका लागि ५ देखि ६ राउण्ड लगाउनेछ ।

प्रियंका र निकको मेहन्दी र संगीतको कार्यक्रम २९ नोभेम्बरमा हुनेछ । संगीतको कोरियोग्राफ गणेश हेगडेले गरिरहेका छन् । संगीतमा प्रियंकाले उनी अभिनित हिन्दी फिल्मका गीतमा प्रस्तुति दिनेछिन् भने प्रियंकाको लागि दुलहा निकले आफ्नो ग्रुपकासाथ अंग्रेजी तथा हिन्दी गीत गाउनेछन् ।

यसैगरी ३० नोभेम्बरमा प्रियंका र निकले आफ्ना नजिकका साथी तथा परिवारजनका लागि ककटेल पार्टीको आयोजना गर्नेछन् । डिसेम्बर १ मा ‘हल्दी’ कार्यक्रम रहेको छ । प्रियंका र निकले २ वटा धर्मको रीतिरिवाज अनुसार विवाह गर्नेछन् ।

डिसेम्बर २ मा हिन्दु र डिसेम्बर ३ मा क्रिश्चियन रीतिरिवाजमा विवाह हुनेछ । प्रियंका उनको हिन्दु रीतिरिवाजमा हुने विवाहका दिन डिजाइनर अबुजानी र सन्दीप खोसलाले डिजाइन गरेको पहिरन लगाउन छिन् भने क्रिश्चियन विवाहमा राल्फ लरेनको ड्रेस लगाउनेछिन् ।

विवाहपछि प्रियंका चोपडा र निक जोनसले २ वटा रिसेप्शन दिनेछन् । एउटा रिसेप्शन दिल्लीमा आयोजना हुनेछ । जहाँ भारतका प्रधानमन्त्री नरेन्द्र मोदी र राजनेताहरुलाई आमन्त्रण गरिनेछ ।

दोस्रो रिसेप्सन मुम्बईमा हुनेछ । जहाँ सलमान खान र उनको परिवार, आलिया भट्ट, रणवीर कपूर, कट्रिना केफ, फरहान अख्तरलगायत बलिउडका कलाकारहरु सहभागी हुनेछन् । तर रिसेप्सन पार्टीको मिति भने अहिले सार्वजनिक गरिएको छैन ।

हालै विवाह बन्धनमा बाँधिएका दीपिका र रणवीरको विवाहको तस्बिरका लागि मिडिया तथा फ्यानहरुले केही समयसम्म पर्खनु परेको थियो ।

यही कुरा प्रियंकाको विवाहमा पनि दोहोरिने छ । प्रियंका र निकका साथै विवाहमा सहभागी पाहुनाहरुसमेत हेलिकप्टरमार्फत विवाहस्थलमा जाने भएकाले प्रियंका र निकका विवाहको तस्बिर ढिलो सार्वजनिक हुनेछ ।

अन्तिम अपडेट: कात्तिक १५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्