बलिउड अभिनेता नसिरुद्दिन शाहले भारतीय क्रिकेट टिमका कप्तान विराट कोहलीको सामाजिक संजालमा कडा आलोचना गरेका छन् । केही समयअघि क्रिकेटर कोहलीले क्रिकेटका एक फ्यानलाई भारत छोडेर जान भनेका थिए । विराटको यस किसिमका कुराले उनको निकै आलोचना पनि भएको थयो । अहिले अभिनेता नसिरुद्दिन शाह पनि विराटको यस बयानका कारण खुलेरै आलोचना गरेका छन् । 

नसिरुद्दिनले उनको फेसबुक अकाउन्टमा एक स्टाटस पोष्ट गरेका छन् । उनले लेखेका छन् ‘विराट कोहली संसारकै उत्कृष्ट बल्लेबाज हुनुका साथै एक खराब व्यवहार भएका खेलाडी हुन् । उनको क्रिकेट खेल्ने क्षमता उनको अहंकार र खराब व्यवहारका अगाडि फिक्का भइदिन्छ । र मलाई भारत छोडेर जाने कुनै चाहना छैन ।’

केही दिन अघि क्रिकेटर विराट कोहलीकोएक भिडियो सामाजिक संजालमा भाइल भएको थियो । जसमा विराट एक फ्यानलाई भारत छोडेर जाने सल्लाह दिइरहेका छन् । विराट कोहलीलाई एक जनाले आफूलाई विराट कोहली र भारतीय क्रिकेटरहरुभन्दा इङ्गल्याण्ड र अष्ट्रेलियन खेलाडीहरु राम्रो लाग्ने बताएपछि विराट भड्किएका थिए । 

विराट कोहलीको यस किसिमको बयान पछि उनले धेरै आलोचना भएको थियो । केही समय अघिको यस घटनाको मुद्दालाई अभिनेता नसिरुद्दिन शाहले एक पटक फेरि उठाएका छन् । नसिरुद्दिन शाहको यस स्टाटसमा केहीले समर्थन जनाएका छन् । तर धेरैजसो व्यक्तिहरु नसिरुद्दिन माथि नै खनिएका छन् ।