अन्तर्राष्ट्रिय क्रिकेट परिषद आईसीसीले क्रिकेटभित्र हुन अनियमितता रोक्न इन्टरपोलसँग सहकार्य गर्ने भएको छ ।

विभिन्न चरणमा क्रिकेट खेलाडी तथा पदाधिकारीहरु म्याच फिक्सिङमा पर्ने गरेकाले क्रिकेटलाई शुद्धीकरण गर्न आईसीसीले विश्वभर संगठन भएको इन्टरपोलसँग सहकार्य गर्न लागेको हो ।

इन्टरपोलको मुख्यालय पुगेर आईसीसीको भ्रष्टाचार निवारण इकाइ महाप्रबन्धक एलेक्स मार्शलले छलफल गरेका थिए । छलफलमा आईसीसी र इन्टरपोल मिलेर काम गर्ने सहमति भएको जनाइएको छ ।

छलफलपछि आईसीसीका एलेक्स र्माशलले भने ‘आईसीसी इन्टरपोलसँग मिलेर काम गर्न उत्सुक छौं ।’ आईसीसीले अहिले पनि विभिन्न देशका भ्रष्टाचार निवारण संस्थासँग मिलेर काम गरिएको बताउँदै उनले इन्टरपोलसँज सहकार्य गर्दा विश्वका १९४ राष्ट्रको सञ्जालसँग सजिलै जोडिने पनि उल्लेख गरे ।

यस्तै इन्टरपोलका सहायक निर्देशक जोस डे ग्रेसियाले खेलकुदले सबैलाई एकै ठाउँमा ल्याउने बताउँदै तर यसमा आपराधिक गतिविधि हुन नदिने विषयमा काम गर्न तयार रहेको बताए ।