प्रधानमन्त्रीको स्पष्टोक्ति: मेरो सरकार भन्ने शब्द भुलचुकले नभइ जानीबुझी राखिएको हो

 बैशाख २४, २०७६ मंगलबार १४:२३:५२ | उज्यालो सहकर्मी
unn.prixa.net

काठमाण्डौ - प्रधानमन्त्री केपी शर्मा ओलीले राष्ट्पतिले सरकारको नीति तथा कार्यक्रम सार्वजनिक गर्दा मेरो सरकार भनेर उच्चारण गर्नुलाई उचित सम्बोधन भएको बताउनुभएको छ ।  

सरकारले ल्याएको नीति तथा कार्यक्रममाथिको छलफलमा भाग लिँदै उहाँले नीति तथा कार्यक्रममा मेरो सरकार भन्ने शब्द भुलचुकले परेको नभइ सुविचारी ढंगले जानीबुझि राखेको पनि प्रष्ट पार्नुभयो । 

उहाँले भन्नुभयो, ‘मेरो सरकार भन्ने शब्द भुलचुकले होइन, सुविचारी ढंगले जानीबुझी राखेको शब्द हो ।’

साथीहरुले मेरो सरकार भन्ने शब्दलाई मात्रै ध्यान दिएको भन्दै यसले पहाड खनेर मुसो पनि ननिस्कने जस्तो कुरा भएको उल्लेख गर्नुभयो ।  सम्माननीय राष्ट्पतिले मेरो सरकार भन्नु कुनै अचम्मको विषय नभई संसारभरको अभ्यास अनुसार नै भएको पनि प्रष्ट पार्नुभयो । 

साथिहरुले पोहोर त यस्तो थिएन भन्नुभयो तर हामी विगतका नमिलेका कतिपय कुराहरुलाई मिलाउँदै अघि बढेको भन्दै अन्तरराष्ट्रिय अभ्यास अनुसार नै यस्तो सम्बोधन भएको बताउनुभयो । 

‘मेरो देश, मेरो सरकार भनेर राष्ट्पतिले ढुक्कले भन्ने हो,’ उहाँले भन्नुभयो, ‘राष्ट्पतिले मात्रै होइन तपाई हामी सबैको होइन र यो देश, यो सरकार ?’

राष्ट्रपति देशकै अभिभावक रहेकाले आफूभन्दा मातहतको सरकारलाई मेरो सरकार भन्नु नाजायज नरहेको स्पष्ट पार्नुभयो । लोकतन्त्रमा मेरो सरकार भन्न पाईँदैन भन्ने नभई लोकतन्त्रमा हामी सबैको सरकार हो भन्न पाउने विधि स्थापित गर्न खोजेको उहाँले बताउनुभयो । 


 

अन्तिम अपडेट: फागुन ३०, २०८०

तपाईको प्रतिक्रिया