युरोपा लिगमा उपाधिका लागि चेल्सीले आर्सनलसँग खेल्ने

 बैशाख २७, २०७६ शुक्रबार ८:२:२६ | उज्यालो सहकर्मी
unn.prixa.net

युरोपा लिगमा चेल्सीले उपाधिका लागि आर्सनलसँग खेल्नेछ । जर्मन क्लब फ्रांकफर्टलाई टाइब्रेकरमा चार तीन गोलले हराउँदै चेल्सीले युरोपा लिगको फाइनलमा स्थान बनायो । 

पहिलो लेग एक–एक गोलको बराबरीमा सकिएको खेलको दोस्रो लेग पनि एक–एक गोलमा सकिएको थियो । घरेलु मैदान स्टाम्फोर्ड ब्रिजमा भएको दोस्रो लेगमा चेल्सीले एक गोलको अग्रता जोगाउन सकेन । खेलको २८ औं मिनेटमा लोफ्टुस चीकले गोल गर्दै टिमलाई एक शून्यले अगाडि राखेका थिए । 

तर ४९ औं मिनेटमा जोभिकले गोल गर्दै पाहुना टिमलाई बराबरीमा पुर्‍याए । त्यसपछि दुबै टिमबाट गोल नभएपछि खेल टाइब्रेकरमा गयो । जसमा चेल्सीका लागि इडेन हाजार्डले विजयी गोल गर्न सफल भए ।

यो सिजनपछि उनी रियल जाने चर्चा भइरहेका बेला फेरि पनि चेल्सीको जितमा अन्तिममा उनी नै नायक बने । युरोपा लिगको फाइनल खेल अजरबैजानको बाकुमा २९ मे मा हुनेछ । 

यो सिजनको युरोपियन प्रतियोगिताको उपाधि इंग्ल्याण्ड आउने भएका छन् । कारण च्याम्पियन्स लिगमा पनि दुबै फाइनलिस्ट इंग्लिस क्लब छन् भने युरोपा लिगमा पनि दुबै इंग्ल्याण्डका क्लव बनेका छन् । जुन युरोपियन प्रतियोगितामा पहिलो पटक हुन लागेको हो ।
 

अन्तिम अपडेट: जेठ २०, २०७६

तपाईको प्रतिक्रिया